Qyzylorda oblysyndaǵy avtobýs apaty: 29 jolaýshy aýrýhanada, 45 adam úıine jiberildi

QYZYLORDA. QazAqparat - Qyzylorda oblysynyń Qarmaqshy aýdanynda soqtyǵysqan eki avtobýstyń 29 jolaýshysy aýrýhanada jatyr. Taǵy 45-i úıine jiberildi. Bul týraly búgin Óńirlik kommýnıkatsııalar qyzmetinde oblystyq jolaýshylar kóligi jáne avtomobıl joldary, Densaýlyq saqtaý, jumyldyrý daıyndyǵy basqarmalary jáne jergilikti polıtsııa qyzmeti basshylarynyń qatysýymen ótken brıfınge málim etildi.

«Qazaly-Qyzylorda»  men «Qyzylorda-Qarmaqshy» baǵytyndaǵy 2 avtobýsta barlyǵy 86 adam bolǵan. Medıtsınalyq kómek 74 jolaýshyǵa kórsetildi, onyń 29-y aýrýhanalarǵa jetkizildi jáne dárigerlerdiń baqylaýynda. Qalǵan 45 jolaýshyǵa alǵashqy medıtsınalyq kómek kórsetilip, ambýlatorlyq em taǵaıyndaldy. Apat ornynda 2 adam qaıtys boldy jáne  aýyr jaraqat saldarynan aýrýhanada bir bala kóz jumdy», - dedi oblystyq densaýlyq saqtaý basqarmasynyń orynbasary Oljas Ysqaqov.

Oblys ákimi baspasóz qyzmetiniń málimetinshe, qaıtys bolǵan jandardyń otbasylaryna jergilikti bılik tarapynan qajetti kómek kórsetilip jatyr.

Oqıǵa ornynda jergilikti polıtsııa qyzmetiniń 34 qyzmetkeri, 13 arnaıy tehnıka men 34 tótenshe jaǵdaılar departamentiniń qutqarýshysy,  130 medıtsına qyzmetkeri, onyń ishinde 16 dáriger jumyldyryldy. Sondaı-aq, 12 jedel járdem brıgadasy jumys istedi.

Sonymen qatar, Jalaǵash jáne Josaly aýdandarynda eki aýrýhana jáne oblystyq medıtsınalyq ortalyq zardap shekkenderge kómek kórsetýde.

Eske sala ketsek, 16 qarashada Qyzylorda oblysynyń Qarmaqshy aýdanynda eki jolaýshylar avtobýsy soqtyǵysyp, 14 adam zardap shekkenin habarlaǵan bolatynbyz. Eki adam qaza tapty.  Keıin aýrýhanada zardap shekken balanyń biri kóz jumdy.