Qyzylorda oblysynda jylý-tútin kamerasy paıdalanýǵa berildi
QYZYLORDA. 26 qazan. QazAqparat - Qyzylorda oblysy TJD «ÓSjAQJQ» MM №9 órt sóndirý bóliminiń ǵımaratynda jańadan salynǵan jylý-tútin kamerasynyń ashylý saltanaty boldy.
Onda órt sóndirýshilerge departament bastyǵy polkovnık Erik Tóleýjanov bul kameranyń tájirıbelik paıdasy zor ekendigin áńgimeledi.
Qazaqstan Respýblıkasy TJM-niń 2010 jylǵy 22 jeltoqsandaǵy №446 buıryǵymen bekitilgen «QR TJM Memlekettik órtke qarsy qyzmet organdarynyń gaz-tútinnen qorǵaý qyzmetin uıymdastyrý jónindegi tálimdemesiniń» talaptaryna sáıkes mekeme kúshimen jylý-tútin kamerasynyń salynǵandyǵy tyń ıdeıanyń júzege asqandyǵy bolyp otyr.
Jylý-tútin kamerasynda órt sóndirýshiler tynys alýǵa jaramsyz ortada kúndelikti qyzmette atqaratyn jaýyngerlik is-qımyldaryn shyńdaıdy. Sonymen birge psıhologııalyq daıyndyqtary arta túsedi.
Oryn alatyn árbir tótenshe jaǵdaı nemese órt oqıǵalary bet qaratpas jalyn jáne qolqany alatyn alapat tútinnen turady. Osyndaı qıynshylyqqa toly kezeńde órt sóndirýshilerdiń daıyndyǵy da joǵary bolýy mańyzdy. «Jattyǵýda ádis-tásilderdi meńgerip, ter tókseń, órt oqıǵasy barysynda alapat otty aýyzdyqtaý da jeńilirek» bolatyny sózsiz. Sondyqtan da órt sóndirýshilerdiń jumystaryn ońtaılandyrý úshin osyndaı arnaıy oryndarda tájirıbe jasaý, jattyǵý qajet.
