Qyzylorda oblysynda jyl basynan 39 jemqorlyq qylmysy anyqtaldy
QYZYLORDA. QazAqparat - Qyzylorda oblysynda sybaılas jemqorlyq qylmystarynyń sany ótken jyldyń birinshi toqsanymen salystyrǵanda 17 paıyzǵa tómendegen.
Bul týraly «Sybaılas jemqorlyqqa qarsy is-qımyl týraly Ulttyq baıandama» kórsetkishteri men aımaqtaǵy sybaılas jemqorlyq jaǵdaıy boıynsha baspasóz konferentsııasyn ótkizgen QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń mindetin atqarýshy B. Baıhojaev málimdedi, dep habarlaıdy QazAqparat.
2018 jyldyń birinshi toqsanynda aımaqta sybaılas jemqorlyq sıpatyndaǵy 39 qylmys tirkelse, ótken jyldyń osy kezeńinde 47 qylmys anyqtalǵan bolatyn.
Sybaılas jemqorlyqtyń kórinisterin tómendetýge qol jetkizý algorıtminiń basty baǵdarlamalyq qujaty bolyp tabylatyn 2015-2025 jyldarǵa arnalǵan Sybaılas jemqorlyqqa qarsy strategııany iske asyrý Qyzylorda oblysynda tıimdi júzege asyrylýda.
Sonyń aıqyn kórinisi, sońǵy jyldary oblys boıynsha sybaılas jemqorlyq faktileri tómendegen. Bul sıpattaǵy qylmystardyń sany 2016 jyly - 145 bolsa, 2017 jyly 121 qylmys bolyp otyr. Sondaı-aq júrgizilgen saýalnamalar qorytyndysyna sáıkes, sybaılas jemqorlyq jaǵdaılaryna tap bolǵandardyń da sany azaıyp otyr. Saýalnamaǵa qatysqan aımaq turǵyndary arasynda 2016 jyly 26,4 paıyzy, 2017 jyly 24,3 paıyzy paraqorlyq kórinisterine kezdeskenderin aıtqan.
