Qyzylorda oblysynda júrekke ashyq ota jasaý kólemi 20 paıyzǵa ulǵaıdy
ASTANA. QazAqparat - Bıyl joǵary mamandandyrylǵan medıtsınalyq kómek aýqymynyń keńeıýine oraı, respýblıkalyq bıýdjetten shamamen 1,5 mlrd. teńge qarjy bólinip, nátıjesinde júrekke ashyq ota jasaý 20%-ǵa, neırohırýrgııalyq operatsııalar sany 27%-ǵa, endoprotezdeý sany 2 esege deıin ósti. Bul týraly Qyzylorda oblysynyń densaýlyq saqtaý basqarmasynyń basshysy Aqmaral Álnazarova habarlady.
- Aǵymdaǵy jyldyń maýsym aıynan bastap oblysta oftalmohırýrgııalyq ortalyq ashyldy. Jergilikti bıýdjetten 90 mln. teńgege joǵary dıagnostıkalyq qural-jabdyqtar satyp alynyp, ótken jylmen salystyrǵanda jasalǵan ota sanynyń 2 esege deıin ósýine septigin tıgizdi. Oblysta oftalmologııalyq ortalyqta alǵash ret glaýkomalyq kabınet ashylyp, 2000-nan astam naýqas glaýkomamen esepke alyndy. Synaq rejıminde Baıqońyr qalasynda oblystyq medıtsınalyq ortalyqtyń fılıaly ashyldy,- dedi Aqmaral Álnazarova.
