Qyzylorda oblysynda jumyrtqa defıtsıtin boldyrmaý úshin 400 mln teńge bólindi
Sońǵy kúnderi Qyzylorda oblysynda jumyrtqa tapshylyǵy aıqyn sezildi. Bul atalǵan ónim baǵasynyń aspandap ketýine alyp keldi. Jergilikti turǵyndar áleýmettik jelide onyń 1 danasyn 55-60 teńgege satyp alyp jatqanyn jazýda.
Oblystyq Aýyl sharýashylyǵy basqarmasynyń basshysy Shahmardan Qoıshybaev búgin Óńirlik kommýnıkatsııalar qyzmeti alańynda brıfıng ótkizip, elimizde tirkelgen qus tumaýy jumyrtqa baǵasyna keri áser etkenin aıtty. Dúken sórelerinde atalǵan ónimniń tapshylyǵy da sezilgen. Onyń ústine taýyqqa beriletin jemniń baǵasy ósken. Sonyń saldarynan oblysqa keletin jumyrtqanyń kólemi birshama azaıǵan.
Málim etilgendeı, Qyzylorda oblysyna aldaǵy úsh kúnde 3 mıllıon dana jumyrtqa jetkiziledi. Al 600 myń danasynan astamy búgin keledi.
«Aımaqta jumyrtqa óndiretin eki kásiporyn bar. Onyń qýattylyǵy ishki naryqtyń qajettiligin tolyq qamtamasyz ete almaıdy. Sol sebepti syrttan tasymaldaýǵa táýeldimiz. Qazirgi tańda kásipkerlermen kelissóz júrgizilýde. Bıylǵy jyldyń 25 jeltoqsanyna deıin jumyrtqa tıelgen segiz júk kóligi oblysqa keledi. Aldaǵy mereke kúnderi de tapshylyqty boldyrmaý maqsatynda jumyrtqa jetkiziledi. Oblysta jumyrtqaǵa tapshylyq bolmaıdy», - dedi basqarma basshysy.
Tapshylyqty boldyrmaý maqsatynda jergilikti bıýdjetten 400 mıllıon teńge qarjy bólingen. «Baıqońyr» áleýmettik-kásipkerlik korporatsııasy» AQ arqyly 8 kásipkerge 50 mıllıon teńgeden aınalym qarajaty berilgen.
«Bizdiń basty maqsatymyz - negizgi áleýmettik mańyzy bar ónimderdiń tapshylyǵyn boldyrmaý. Máselen, kásipkerler qus fabrıkalarynan jumyrtqanyń bir danasyn 36 teńgeden alyp jatyr. Aınalym qarajatyn alǵan kásipkerler endi atalǵan ónimdi qymbat satpaıdy. Alypsatarlyqqa jol bermeý úshin baqylaý júrgizemiz. Al basqa ónimderge ekonomıkalyq jaǵynan tıimsiz bolǵandyqtan shekti baǵa qoıyp otyrǵan joqpyz. Óıtkeni, qoldan tapshylyq jasalady», - dedi Sh.Qoıshybaev.