Qyzylorda oblysynda júktemesi 8 tonnadan asatyn kólik qozǵalysyna shekteý engizildi
QYZYLORDA. QazAqparat - Qyzylorda oblysynda respýblıkalyq mańyzy bar avtomobıl joldarynda júktemesi 8 tonnadan asatyn kólik quraldaryna ýaqytsha shekteý engizilmek.
Bul týraly Óńirlik kommýnıkatsııalar qyzmetiniń baspasóz máslıhatyna oblystyq kóliktik baqylaý ınspektsııasynyń basshysy Erjan Joldasov aıtty, dep habarlady QazAqparat tilshisi.
«Jol jelileriniń saqtalýyn qamtamasyz etý sharalary avtokólikterge kóktem jáne jaz mezgilinde shekteý engizýdi talap etedi. Sebebi, klımattyq erekshelik - jol boıyndaǵy qozǵalys jaǵdaıyna, jumys rejimine tikeleı áser etetin faktordyń biri. Máselen, qys mezgilinen kóktemge aýysý kezeńindegi 0-15 gradýs aralyǵynda jol jelisi jumsaryp, aýyr salmaqty kólikterdiń qozǵalysyna tótep berý kúshinen aıyrylady. Osyǵan qarap 40-50 tonna júk tasymaldaıtyn kólikterdiń keltiretin zııanyn baǵamdaýǵa bolady. Aıta ketý kerek, mundaı shekteýler jyl saıyn engiziledi jáne bul tájirıbe aýa raıy uqsas ózge elderde de qoldanylady. V jol-klımattyq aımaqqa jatatyndyqtan, bizde kóktemgi shekteý 1 naýryzdan 1 sáýirge deıin júrgiziledi. Ótken jyly shekteý boıynsha birqatar túsindirme jumystary uıymdastyryldy. Degenmen, zań talaptaryn attaǵan 177 jeke jáne zańdy tulǵa anyqtalyp, ákimshilik jaýapkershilikke tartyldy, - dedi ınspektsııa basshysy.
Sondaı-aq baspasóz máslıhatynda, halyqaralyq kelisimderge sáıkes tótenshe jaǵdaılardy joıý jáne aldyn alý jónindegi sharalardy júzege asyratyn, tez buzylatyn taýarlarmen, dári-dármek tasymalymen aınalysatyn avtomobılderge shekteý qoıylmaıtyny aıtyldy. Sonymen qatar ınspektsııa kóktemgi shekteý kezindegi zańnama talaptaryn túsindirý maqsatynda «Jolda qabyldaý» aktsııasyn uıymdastyrdy. Naýqan 1-3 naýryz aralyǵynda Samara - Shymkent tas jolynyń 1835 shaqyrymyndaǵy Birqazan kentiniń mańynda ótýde.
Foto: ru.slovoidilo.ua
