Qyzylorda oblysynda júk poıyzy relsten shyǵyp ketti
QYZYLORDA. QazAqparat - Qyzylorda oblysynyń aýmaǵynda júk poıyzynyń 16 vagony relsten shyǵyp ketti, dep habarlaıdy QazAqparat oblys ákiminiń baspasóz qyzmetine silteme jasap.
12 qarashada saǵat 23:40 shamasynda Qyzylorda oblysy boıynsha tótenshe jaǵdaı departamentiniń kezekshi qyzmetkerinen Qazaly-Aral baǵytyndaǵy Aral aýdanyna qarasty "Qamystybas-Shómish" aýmaǵynyń 2426 shaqyrymynda PK-7 P-1273 júk poıyzy relsten shyqqany týraly habarlandyrý túsken, apattyń sebebi anyqtalyp jatyr.
TJD málimetine sáıkes, mashınıst B.Baımahanov basqarǵan TEZZA-0137 teplovozy tejegish magıstralinde qysym tómendeýine baılanysty saǵatyna 73 shaqyrym jyldamdyqpen kele jatqan boıda saǵat 23.05 jedel toqtaý jasaǵan.
Poıyz quramyn qaraý barysynda bas jaǵyndaǵy 6-21 vagondary relsten shyqqany anyqtaldy (quramynda 45 vagony bar júk poıyzynyń 16 vagony aýdarylǵan, júgi anyqtalýda). Adam shyǵyny joq.
Qazirgi tańda oqıǵa ornynda «Qazaqstan temir joly» UK» AQ apatty-qutqarýshy qyzmetteriniń 70 qyzmetkeri (onyń ishinde 2 qalpyna keltirý poıyzy), TJD, sondaı-aq, Aral jáne Qazaly aýdandary ákimdikteri men oblystyq jumyldyrý daıyndyǵy basqarmasynyń 25 qyzmetkeri jumys istep jatyr. Oqıǵa saldarynan 3 jolaýshy poıyzy toqtap tur, atap aıtqanda:
Qazaly stansasynda № 481 «Tashkent-Samara» poıyzy; Aral teńizi stansasynda № 378 «Mańǵyshlaq-Almaty» poıyzy; Sekseýil stansasynda № 618 «Qyzylorda-Astana» poıyzy.
«Almaty-Mańǵyshlaq» jolaýshy poıyzynda 723 adam, onyń ishinde 7 jasqa deıingi 39 bala, «Qyzylorda-Astana» poıyzynda 191 adam, onyń ishinde 7 jasqa deıingi 40 bala, «Tashkent-Samara» poıyzynda 183 jolaýshy, onyń ishinde 13 bala bar. Adam shyǵyny men zardap shekkender joq, jergilikti polıtsııa qyzmetiniń kúshimen 3 poıyz jolaýshylarynyń qaýipsizdigi qamtamasyz etildi.
«Qyzylorda oblysy ákimdigi tarapynan kelesideı sharalar qabyldandy: relste jóndeý-qalpyna keltirý jumystary júrgizilip jatyr, jolaýshy poıyzdary Aral jáne Qazaly stansalarynda toqtap tur. Jolaýshylarǵa qajetti kómek kórsetilýde. Ol úshin jergilikti kásipkerler jumyldyrylǵan. Poıyz ishindegi aýa raıyn saqtaýǵa qajetti qatty otyn qory jasaqtaldy. Zardap shekken jolaýshylar joq. Degenmen, órt sóndirý tehnıkasy men jedel járdem kóligi arnaıy kezekshilikke qoıyldy. Sonymen qatar, jaqyn mańdaǵy eldi mekenderdegi medıtsınalyq beketter qajet bolǵan jaǵdaıda adamdardy qabyldaýǵa daıyn», - dep málimdedi oblystyq jumyldyrý daıyndyǵy basqarma basshysynyń orynbasary Ǵabıt Jańabaev.
