Qyzylorda oblysynda jol apatynda bes adam qaza tapty: tergeý komıssııasy quryldy

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi (budan ári – QR Eńbekmıni) Qyzylorda oblysyndaǵy Qyzylorda-Qumkól tas jolynda oryn alǵan, saldarynan 5 adam qaza tapqan iri JKO-nyń mán-jaılaryn tekserý úshin komıssııa qurdy. Bul týraly QazAqparat QR Eńbek jáne halyqty áleýmettik qorǵaý mınıstrligine silteme jasap.

Aǵymdaǵy jylǵy 13 qańtar kúni saǵat 14:30 shamasynda Qyzylorda-Qumkól tas jolynyń 69 shaqyrymynda «SNPS-Aıdan Munaı» AQ-qa tıesili «Mersedes-Benz sprinter» avtokóligi men «SPMK» JShS-ǵa tıesili «Toyota Hilux» avtokóligi soqtyǵysyp, saldarynan oqıǵa ornynda «SNPS-Aıdan Munaı» AQ-nyń 1 jumyskeri jáne «SPMK» JShS 2 jumyskeri qaza tapty.

Oqıǵa ornynan «jedel járdem» qyzmeti joǵaryda atalǵan kompanııalardyń zardap shekken 8 jumyskerin qalalyq aýrýhanaǵa jetkizdi, olardyń ishinde aýrýhanaǵa barar jolda «SNPS-Aıdan Munaı» AQ-nyń 1 jumyskeri kóz jumdy, «SPMK» JShS-niń 1 jumyskeri aýrýhanada qaıtys boldy, «Bastaý-S» JShS-niń 1 jumyskeri reanımatsııa bólimshesine jatqyzyldy, «SNPS-Aıdan Munaı» AQ-nyń 1 jumyskeri ambýlatorııalyq em alý úshin úıine jiberildi, qalǵan 4 jumysker aýrýhanaǵa jatqyzyldy.

JKO saldarynan jalpy 5 adam qaza taýyp, 6 adam túrli jaraqat aldy.

Toptyq jazataıym oqıǵanyń mán-jaıy men sebepterin tekserý úshin Eńbekmıni Eńbek, áleýmettik qorǵaý jáne kóshi-qon komıteti tóraǵasynyń ókimimen Qyzylorda oblysynyń bas memlekettik eńbek ınspektory Tóreahmet Jolymbetovtiń tóraǵalyǵymen arnaıy komıssııa quryldy.

Tekserý nátıjeleri týraly qosymsha habarlanatyn bolady.