Qyzylorda oblysynda jol apatynan úsh adam kóz jumdy
QYZYLORDA. QazAqparat - Qyzylorda oblysynda eki avtokóliktiń soqtyǵysyp, úsh adam kóz jumdy, dep habarlaıdy QazAqparat tilshisi.
Oqıǵa 14:00 shamasynda «Qyzylorda-Jezqazǵan» tas jolynyń boıyndaǵy Qumkól trassasy aýmaǵynda bolǵan. Sprınter jáne pıkap jeńil avtokólikteri soqtyǵysqan. Apat Qyzylorda qalasynan 60-70 shaqyrym qashyqtyqta bolǵan.
Qyzylorda oblystyq Tótenshe jaǵdaılar departamenti Órt sóndirý jáne apattyq-qutqarý jumystary qyzmetiniń habarlaýynsha, jeńil avtokóliktegi eki adam men shaǵyn avtobýs júrgizýshisi kóz jumdy. Úsh adamnyń densaýlyǵyna baılanysty shaǵymy joq. Tórt adamǵa alǵashqy medıtsınalyq kómek kórsetilse, ekeýin jedel járdem oqıǵa ornynan alyp ketken.
«Qazir oqıǵa ornynda tótenshe jaǵdaılar salasynyń mamandary jumys isteýde. Oqıǵanyń mán-jaıy anyqtalýda. Kólikterdiń qandaı mekemege qarasty ekeni naqtylanýda», - dedi Qyzylorda oblystyq Tótenshe jaǵdaılar departamenti Órt sóndirý jáne apattyq-qutqarý jumystary qyzmetiniń baspasóz hatshysy Álııa Erejepova.
