Qyzylorda oblysynda joǵalǵan 7 jasar qyzdyń denesi tabyldy

QYZYLORDA. QazAqparat – Qyzylorda oblysynda joǵalǵan qyzdyń denesi tabyldy, dep habarlaıdy QazAqparat polisia.kz-ke silteme jasap.

«7 tamyzda Qarmaqshy aýdandyq polıtsııa bólimine Turmaǵanbet aýylynyń turǵynynan 7 jastaǵy qyzynyń joǵalǵandyǵy týraly habarlama tústi. Ákesiniń aıtýy boıynsha, onyń qyzy 6 tamyz kúni keshki ýaqytta úıinen shyǵyp ketip, qaıta oralmaǵan.

Qyzdyń ata-anasy men týystary ony óz betimen tabýǵa tyrysqan. Alaıda izdeý jumystary nátıje bermegen soń, polıtsııaǵa júgingen.

Habarlama túsken sátten bastap polıtsııa qyzmetkerleri dereý izdeý jumystaryna kiristi. Joǵalǵan qyzdy izdeýge Qarmaqshy aýdandyq polıtsııa bóliminiń jeke quramy, Tótenshe jaǵdaılar departamenti men aýdan ákimdiginiń qyzmetkerleri, volonterler, jalpy 60-tan astam adam jumyldyryldy. Sondaı-aq balany tabý maqsatynda eki dron paıdalanyldy.

Búgin saǵat 13:00 shamasynda qyzdyń máıiti»Úbis«kanalynan tabyldy. Zorlyq-zombylyq belgileri baıqalmady», - delingen polıtsııa habarlamasynda.

Aldyn ala málimet boıynsha, bala kanalǵa sýǵa batyp ketken.

Sotqa deıingi tergep-tekserý áreketteri júrgizilip jatyr, tıisti saraptamalar taǵaıyndaldy.

Eske salaıyq, 2016 jyly dúnıege kelgen Jibek Dáýrenbekqyzy izdestirilip jatqany týraly buǵan deıin jazǵan bolatynbyz.