Qyzylorda oblysynda jasalǵan shyny plastıkalyq qaıyqtarǵa suranys artyp keledi
ASTANA. QazAqparat - Qyzylorda oblysynda jasalǵan shyny plastıkalyq qaıyqtarǵa suranys artyp keledi, dep habarlaıdy QazAqparat Habar 24 saıtyna silteme jasap.
Qyzylorda óńirindegi jalǵyz sý kóligin qurastyrý tsehy Aral teńizi mańynda ornalasqan. Úsh jyl buryn ashylǵan óndiris oshaǵy ónim kólemin 3 esege ulǵaıtqan. Aral teńiziniń muzy erisimen, sheberhanada jumys qyzady. Tapsyrys berýshiler qatary mol. Negizinen balyq sharýashylyǵymen aınalysatyn araldyqtar teńiz tolqynyna shydas beretin qaıyq beriktigine basa mán beredi. Sheberler buǵan deıin qaıyqtyń pishinin jasaý, jelimdeý, boıaý jumystarynyń barlyǵyn qolmen isteıtin. Al qazir protsestiń elý paıyzy avtomattandyrylǵan. Araldyq ustalar qajetti shıkizatty Eýropadan aldyrady.
«Úsh jyl buryn alǵashqy qaıyqty qolmen jasaıtynbyz. Qazir amerıkalyq apparat satyp aldyq. Qosymsha jıhaz da jınalatyn sheberhanada qazir 7 adam turaqty jumyspen qamtylǵan. 1 tonnadan astam júk kótere alatyn qaıyqtardyń ár danasy shamamen 400 myń teńgege baǵalanady», - deıdi kásipker Jasqaırat Qanybetov.
Kásipkerdiń aıtýynsha, qazirgi tańda 3 kúnniń ishinde bir qaıyq jasalýda.
«Araldyq sheberler sý kólikteriniń túr-túrin shyǵarady. Kólderge saıahat jasaýǵa «Trımaran» usynylady. Shyny-plastık buıymnan istelgen jeńil ári qaýipsiz «Kasatka» men «Ploskodonka» qaıyqtary - balyq aýlaýǵa taptyrmas kólik. Sýy tolyp, shaǵalasy oralyp, tirilgen teńiz aıdynynda uzyndyǵy 6 metr, salmaǵy 300 keli tartatyn osy qaıyqtardyń 50 shaqtysy júr», - dep atap ótti Jasqaırat Qanybetov.
Sondaı-aq, Atyraý men Balqashtyń balyqshylary da sý marjanyn súzýge yńǵaıly Aral qaıyqtaryna arnaıy tapsyrys bergen. Endi aldaǵy ýaqytta jergilikti sheberler qolynan shyqqan keme, ıahtalar teńiz tóskeıin tilip júrer kún jaqyn.
