Qyzylorda oblysynda jarty jylda jeti myńnan astam jumys orny quryldy
QYZYLORDA. QazAqparat - Osy jyldyń 1 toqsanynda oblysta eńbekke qabiletti turǵyndar sany 331,4 myń adam bolyp, olardyń arasynan jumyspen qamtylǵandary 315,5 myńǵa jetti.
Jalpy jumyssyzdyq deńgeıi 4,8% boldy, dep habarlaıdy QazAqparat tilshisi oblystyq jumyspen qamtýdy úılestirý jáne áleýmettik baǵdarlamalar basqarmasyna silteme jasap.
Basqarma málimetinshe, bıyl 9500 jańa jumys ornyn qurý josparlansa, alty aıda 7017 jańa jumys orny (6169 turaqty jumys orny) ashyldy. Jyl basynan jumys izdeýshi retinde jumyspen qamtý organdaryna 15799 adam habarlasqan, sonyń ishinen 7315 adam (jalpy habarlasqandarǵa shaqqandardyń 46,3%) jumysqa ornalastyryldy.
Jarty jyl ishinde oblysta 63 ret bos jumys oryndary jármeńkesi ótkizilip, 682 jumys berýshi 2687 bos jumys ornyn usyndy. Jármeńkege 4048 jumys izdeýshi qatysyp, onyń 4200-ne jumyspen qamtýdyń belsendi túrlerine joldama berildi.
