Qyzylorda oblysynda jańa aýdan ortalyǵy qurylady
Qazirgi tańda aýdan ortalyǵy - Áıteke bı kentinde eki qabatty 12 turǵyn úı qurylysy, 250 oryndyq aýdandyq aýrýhana, 600 oryndyq mádenıet úıi men basqa da áleýmettik nysandar salynady dep josparlanýda. Sondaı-aq, bul aýmaqta aldaǵy ýaqytta 24 kásipkerlik nysan boı kóterip, avtomobıl joly qaıta jańartylady. Sondaı-aq, Áıteke bı kentinde Mekemeler úıiniń qurylysy qolǵa alynǵan. Atalmysh jobany iske asyrý bir ǵımaratta ákimdik pen aýdandyq bólimderdi shoǵyrlandyrýǵa múmkindik beredi.
«Qazir aýdandyq ákimdik pen bólimder bólek ǵımarattarda ornalasqan. Bul turǵyndar úshin óte qolaısyz. Onyń ústine, qazirgi aýdan ákimdigi ǵımaratynyń irgetasy 1963 jyly qalanǵan. Elý jyldan astam ýaqyt bolǵan nysan búginde eskirgen. Qazaly aýdanynyń jańa ortalyǵynyń josparyna sáıkes, mekemeler úıi, halyqqa qyzmet kórsetý ortalyǵy, mektepter men aýrýhanalar, sot pen mádenıet úıleriniń ǵımarattary halyqqa yńǵaıly bolý úshin bir-birine jaqyn ornalastyrylady. Aýdanda sońǵy 2 jylda ınfraqurylymdyq jáne basqa da nysandardyń qurylysy qarqyndy júrgizilýde. Sebebi Qazaly aýdany ınfraqurylymmen az qamtylǵan aýdandardyń biri bolyp tabylady», - dedi oblystyq qurylys, sáýlet jáne qala qurylysy basqarmasynyń basshysy Muhamedısa Álserikov.
Sondaı-aq, qurylys, sáýlet jáne qala qurylysy basqarmasynyń basshysy turǵyndarǵa yńǵaıly bolý úshin eki eldimekendi bir ortalyqqa shoǵyrlandyryp, áleýmettik mańyzy bar nysandardy aýdan ortalyǵyna ornalastyrý qajettigin atap ótti.
«Osyǵan baılanysty zamanaýı talaptarǵa saı keletin «Open Space" formatyndaǵy zamanaýı ǵımarat qurylysy josparlanýda», - dedi M.Álserikov.
Aýdanda jol qurylysy men jóndeý jumystaryna basymdyq berilgen. Sebebi bul - Qazaly aýdanyndaǵy eń ózekti máselelerdiń biri sanalady. 2019 jyly Qazaly aýdanynda jol salý jáne jóndeý jumystary boıynsha 16 joba josparlanýda.
Qyzylorda oblysynyń qurylys, sáýlet jáne qala qurylysy basqarmasynyń málimeti boıynsha, 2013-2018 jyldary 200-den astam áleýmettik nysan salyndy. Aıta ketý kerek, jan basyna shaqqanda áleýmettik salaǵa jumsalatyn shyǵyndar boıynsha aımaq sońǵy 6 jylda respýblıkada aldyńǵy qatarda tur.