Qyzylorda oblysynda vıtse-premerdiń qatysýymen malshylar sleti ótti
QYZYLORDA. QazAqparat - Qyzylorda oblysy Jańaqorǵan aýdanynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qyzylorda oblysynyń ákimi Qyrymbek Kósherbaev, «QazAgro» ulttyq basqarýshy holdınginiń jáne Aqtóbe, Ońtústik Qazaqstan, Jambyl, Qaraǵandy, Batys Qazaqstan oblystarynyń ókilderiniń qatysýymen ІІІ oblystyq malshylar sleti ótti, dep habarlady QazAqparat HAA tilshisi.
Shara Qarataý etegindegi «Úsen baýy» taý shatqalynda ótti. Slet barysynda jergilikti aýyl sharýashylyǵy ónimin óndirýshilerdiń kórmesi uıymdastyryldy.
- Qazir Iran, Qytaı, Eýropa, Reseı elderi Qazaqstanda óndiriletin tabıǵı ónimderge úlken qyzyǵýshylyq tanytyp, agrosektorǵa ınvestıtsııa salýǵa, óndirilgen aýylsharýashylyq ónimderdi satyp alýǵa daıyn ekendikterin bildirýde. Osyǵan sáıkes bıylǵy jyldyń ózinde oblys aýmaǵynan 100 tonna múıizdi iri qara etin jáne 25 tonna qoı etin eksportqa shyǵarýdy josparlap otyrmyz. Búginde Iran Respýblıkasyna qoıdy tirideı eksporttaýǵa qyzyǵýshylyq tanytqan birneshe ırandyq kompanııalardyń basshylary bizdiń shaqyrýymyzben oblysta bolyp, mal jáne et satyp alý jóninde kelissózder júrgizip jatyr. Osy baǵytta «Syr marjany» jáne «Shaǵan jer» jaýapkershilikteri shekteýli seriktesteriniń 6000 basqa arnalǵan jańa zamanaýı mal bordaqylaý alańdary eksportqa shyǵaratyn iri qara etin óndiretin bolady. Sonymen qatar Syrdarııa aýdanynda «Abaı-Dáýlet» seriktestigi 10 myń bas qoı bordaqylaý alańy men jylyna 250 tonna qozy etin óndiretin keshenniń qurylysyn aıaqtap, jumysyn bastady,- dedi oblys ákimi Qyrymbek Kósherbaev.
Aımaq basshysy jáne vıtse-premer jáne Respýblıkalyq aýylsharýashylyq qyzmetkerleriniń salalyq kásiptik odaǵynyń tóraǵasy Ábýbákir Súleımenov sletke qatysýshylardy quttyqtap, aýyl sharýashylyǵy salasynyń eńbekkerlerin medaldarmen, QR Aýyl sharýashylyǵy mınıstrliginiń Qurmet gramotasymen jáne oblys ákiminiń Alǵys hatymen marapattady. Arnaıy quttyqtaý men baǵaly syılyqtarǵa aımaqtaǵy 30 ozat malshy ıe boldy.
Shara sońy kontserttik baǵdarlama, ulttyq sporttyq oıyndar jáne jalpyhalyqtyq serýenge ulasty.
