Qyzylorda oblysynda úshinshi neıroınsýlt ortalyǵy ashyldy
ASTANA. QazAqparat - Júrek-qan tamyrlary aýrýlary boıynsha jol kartasy baǵdarlamasy aıasynda 140 mln. teńgege medıtsınalyq qural-jabdyqtar alyndy. Jyl basynan beri ınsýlt pen ınfarkt kezinde medıtsınalyq kómek kórsetý maqsatynda 1000-nan asa medıtsına qyzmetkerleri oqytý kýrstarynan ótti. Bul týraly Qyzylorda oblysynyń densaýlyq saqtaý basqarmasynyń basshysy Aqmaral Álnazarova habarlady.
- Qan aınalym júıesi aýrýlarynyń asqynýyn erte anyqtaý úshin oblys boıynsha alǵash ret joǵary qaýip tobyna jatatyn qan qysymy men mı qan tamyrlarynyń aýrýymen aýyratyndarǵa fýnktsıonaldy zertteý júrgizetin táýekel toby jasaqtaldy. Barlyq aýdandarda ýltradybystyq zertteý mamandarynyń arasynda sheberlik sabaqtary ótkizildi. Júrgizilgen jumystar nátıjesinde 287 naýqas josparly túrde koronografııaǵa jiberildi jáne onyń 18%-na stentteý júrgizildi. 2000-nan astam júrek pen bas mıynyń tamyrlaryna ota jasalyp, byltyrǵy jylmen salystyrǵanda ota jasaý kólemi 15%-ǵa ósken, - dedi Aqmaral Álnazarova.
Aımaqtyń araqashyqtyǵy eskerile otyryp, aǵymdaǵy jyldyń aqpan aıynda Qazaly temirjol aýrýhanasynyń bazasynda Aral, Qazaly, Qarmaqshy aýdandary men Baıqońyr qalasy turǵyndary úshin úshinshi aýdanaralyq neıroınsýlt ortalyǵy ashyldy.
Sáýir aıynan bastap Qazaly aýdandyq ortalyq aýrýhanasynyń bazasynda ınsýlt aýrýymen aýyratyndardy kesh ońaltýdy júrgizý bólimi, sondaı-aq №3 qalalyq emhananyń bazasynda ınsýltpen aýyrǵan naýqastarǵa kesh ońaltýdy júrgizý maqsatynda neıroreabılıtatsııalyq ortalyq ashyldy.
Nátıjesinde qan aınalym júıesi aýrýynan kóz jumý kórsetkishi 100 myń turǵynǵa shaqqanda 11,3 paıyzǵa tómendegen.
