Qyzylorda oblysynda urylar óriste júrgen 179 maldy alyp ketken
QYZYLORDA. QazAqparat - Qyzylorda oblysynda jyl basynan beri mal urlyǵymen aınalysqan 20 qylmystyq top quryqtaldy. Suǵanaq qoldy 103 adam qolǵa tústi, dep habarlaıdy QazAqparat tilshisi.
Ústimizdegi jyldyń 7 aıynda oblys kóleminde 297 mal urlyǵy tirkelgen. Ótken jyldyń dál osy kezeńinde ol 379 derekti quraǵan edi. Nátıjesinde bul kórsetkish 21,6 paıyzǵa tómendegen. Mal urlyǵyn jasaıtyndar 179 maldy óristen alyp ketse, 118-i qoradan urlanyp otyr.
Bıylǵy el nazaryn aýdarǵan qylmystyq oqıǵa Syrdarııa aýdanynda oryn alǵan. Onda mal urlyǵyn kásip etken qylmystyq toptyń joly kesildi. Qylmystyq top quramynda 16 adam bar. Olardyń tarapynan 16 mal urlyǵy jasalǵan. Bul qylmys dáleldenip, sotqa joldandy.
Osy baǵytta qyzylordalyq tártip saqshylary naqty ister júrgizip keledi. Oblys kóleminde 5 márte «Mal urlaýshy» jedel-profılaktıkalyq is-sharalar ótkizildi.
«Qylmysty jedel ashýǵa kedergi keltirip júrgen jaǵdaılar da kezdesedi. Tórt túlik qojaıyndary aldymen maldy ózderi izdeıdi. Sonyń saldarynan arada birneshe kún ótip ketedi. Sodan keıin ǵana ishki ister organdaryna aryzdanady. Bul jaǵdaı qylmystyń izin sýytpaı ashýǵa kedergisin keltiredi», - dedi Qyzylorda oblystyq ishki ister departamenti krımogendik polıtsııa basqarmasy bastyǵynyń orynbasary Darhan Ábdibekov.
Sońǵy úsh jylda Qyzylorda qalasy men oǵan qarasty aýyldarda atalmysh qylmys kórsetkishi 20 paıyzǵa tómendegen. Degenmen esepti merzimde tirkelgen qylmystyń 57 paıyzyn urlyq derekteri qurap otyr.
