Qyzylorda oblysynda ýkraın ǵalymdary dıqandarǵa sý únemdeý tehnologııasyn úıretip júr

ASTANA. QazAqparat – Bıyl Qyzylorda oblysynda sý tapshylyǵyna qaramastan egis alqaby 7 myń gektarǵa ulǵaıyp, 196 myń gektar alqapqa daqyl egilgen. Oblys ákimi Nurlybek Nálibaev ortalyq kommýnıkatsııalar qyzmetinde ótken brıfıngide osnydaı derek keltirdi, dep habarlaıdy QazAqparat tilshisi.

«Ártaraptandyrý jumystaryn jalǵastyrý úshin malazyqtyq daqyldar kólemin 2300 gektarǵa, kartop, kókónis jáne baqsha daqyldaryn 222 gektarǵa, negizgi daqyl – kúrishtiń kólemin 5400 gektarǵa ulǵaıttyq. Áleýmettik mańyzy bar daqyldardy egip, jınap alýǵa yntaly turǵyndar úshin byltyr arnaıy jer telimderi bólindi. Osy ıgi bastama bıyl da jalǵasyp, qala men aýdandarda 3 myń gektardan astam jer berildi. Qazir 5488 otbasyna jer telimderi berilip, aıaq sý júrgizildi. Onyń nátıjesinde turǵyndar ózderin qajetti ónimdermen qamtamasyz ete alady», – dedi ákim.

Onyń aıtýynsha, Syr dıqandaryn qoldaý úshin «Azyq-túlik kelisim-shart korporatsııasymen» birlesip, kúzdegi kúrish ónimin forvardtyq satyp alý jumystary qolǵa alynǵan. Sonyń aıasynda 6000 tonna aq kúrishti satyp alýǵa 1,2 mlrd teńge bólinip, oblystyń 4 sharýashylyǵy «Azyq-túlik kelisim-shart korporatsııasy» UK» AQ-dan kelisim-shart arqyly qarjy alǵan.

«Óńirde Ýkraına ǵalymdarymen birlesip, demonstratsııalyq alań ashylýda. Onyń negizgi maqsaty – sý tapshylyǵyna oraı jańbyrlatyp, tamshylatyp sýarý ádisterimen ártaraptandyrý baǵytyndaǵy soıa, kúnbaǵys, júgeri, bıdaı daqyldarynyń jáne kúrishtiń birneshe sortyn tájirıbe retinde engizý.

Byltyr Úkimet qoldaýymen «Kókaral» bógetin saqtaý jobasyn bastaýǵa respýblıkalyq bıýdjetten 500 mln teńge qaralsa, bıyl 1,9 mlrd teńge bólý kózdelip otyr. Joba 2024 jyly aıaqtalady.

Maqsatyna saı paıdalanylmaǵan aýyl sharýashylyǵy jerin memleket menshigine qaıtarý, ony qaıta aınalymǵa qosý jumystary qarqyndy júrýde. Byltyr 157 myń gektar jer qaıtarylsa, bıyl 200 myń gektardan astam jerdi qaıtarý josparlanǵan», - dedi Nurlybek Nálibaev.