Qyzylorda oblysynda turǵyndardyń 81,5 paıyzy vaktsına saldyrdy

QYZYLORDA. QazAqparat - Qyzylorda oblysynda ekpe qabyldaýǵa qabiletti turǵyndardyń 81,5 paıyzy vaktsına saldyrdy, dep habarlaıdy QazAqparat tilshisi.

Óńirde koronavırýs vaktsınasyn saldyrý naýqany bıylǵy jyldyń 1 aqpanynan bastaldy. Sodan beri vaktsınanyń birinshi komponentimen 368 900 adam qamtyldy. Ol ekpe qabyldaýǵa qabiletti turǵyndardyń 81,5 paıyzy. Al ekinshi komponentti qabyldaǵandar 296 727 (65,6 paıyz) adamǵa jetti. Qazirge deıin óńirde 18 866 koronavırýs juqtyrǵan. Al 18 059 adam qaterli indetten aıyqty (96 paıyz).

«Qazirgi tańda №1 qalalyq emhana, Jalaǵash, Qarmaqshy aýdandary koronavırýsqa qarsy ekpeni salyp aıaqtady. Óńirde qaterli indetke qarsy ımmýndaý naýqanyna 106 ekpe kabıneti, onyń ishinde aýdandarda 91 kabınet tartylǵan.Bul oryndar qajetti medıtsınalyq personalmen jasaqtalǵan. Arnaıy tońazytqysh jabdyǵymen jabdyqtalǵan», - dedi oblystyq densaýlyq saqtaý basqarmasy basshysynyń orynbasary Jangeldi Shaıymbetov.

Eske salsaq, budan buryn Qyzylorda oblysynda 80 myń aýyl turǵyny skrınıng tekserýden ótti.