Qyzylorda oblysynda toı jasaǵandarǵa aıyppul salyndy

QYZYLORDA. QazAqparat - Qyzylorda oblysynda tamyz aıynda monıtorıng tobynyń músheleri 398 nysana tekserip, 56 karantın talabyn saqtamaý faktisin anyqtady, dep habarlaıdy QazAqparat tilshisi.

Óńirde karantın talabyn buzý jaǵdaıy jıi tirkelip jatyr. Osyndaı 56 derek boıynsha kemshilikke jol bergenderge 3,1 mln teńge aıyppul salyndy.

Atap aıtqanda, 9 tamyzda oblys boıynsha 15 reıd júrgizilgen. Onda 55 nysan tekserilip, karantın talabyn buzýǵa qatysty 12 derek anyqtaldy.

«Onyń 12-de jeke adamdar qonaq shaqyryp, toı jasaǵan. Mundaı keleńsizdikter Aral, Qazaly, Shıeli aýdandarynda jáne Qyzylorda qalasynda tirkelgen. Al Qyzylorda qalasynda ornalasqan dámhana qyzmetkeri qorǵanysh quralynsyz kelýshilerge qyzmet kórsetken», - dep málim etti oblystyq Sanıtarlyq-epıdemıologııalyq baqylaý departamentinen.

Sondaı-aq, Qyzylorda oblysynda Ashyq júıesi 2021 jyldyń 26 sáýirinen bastap engizildi. Búginde sanıtarııalyq-epıdemıologııalyq baqylaý qyzmeti Ashyq júıesi arqyly anyqtalǵan «qyzyl» mártebesi bar birqatar adamǵa oqshaýlaný rejımin buzǵany úshin ákimshilik aıyppul saldy. Olar qoǵamdyq tamaqtaný oryndaryna, halyqqa qyzmet kórsetý ortalyǵyna, Qorqyt ata atyndaǵy áýejaı men temirjol vokzalyna kirer kezde anyqtalǵan.

Eske salsaq, Qyzylorda oblysynda turǵyndardyń 61 paıyzy vaktsına saldyrdy.