Qyzylorda oblysynda toı ótkizgen 140 adamǵa aıyppul salyndy
Oblysta qoıylǵan shekteýler men karantın sharalarynyń saqtalýyn baqylaý úshin 24 monıtorıng toby qurylǵan. Top músheleri búgingi kúnge deıin 140-qa jýyq toı ótkizgen adamdy anyqtady. Olarǵa qomaqty mólsherde aıyppul salyndy. Óńirde keıbir kafeler shekti ýaqytqa qaramaı, jumysyn jalǵastyrǵan.
Jumysshy top tarapynan 2486 reıd júrgizildi. Oblys boıynsha jeke adamdar jáne bıznes sýbektileri tarapynan 602 karantın talabyn buzý deregi tirkeldi. Nátıjesinde ákimshilik hattamalar toltyrylyp, 30 mıllıonǵa jýyq aıyppul salyndy.
«Qazirgi kezeńde tıisti qaýly talaptaryn qatań saqtaý qajet. Qazaqta «Aýyryp em izdegenshe, aýyrmaýdyń jolyn izde» degen sóz bar. Ár adamnyń densaýlyǵy myqty bolýy óz qolynda. Sondyqtan saqtyq sharalaryna asa mán bereıik», - dedi oblystyq Taýarlar, qyzmetterdiń sapasy men qaýipsizdigin baqylaý departamenti basshysynyń orynbasary, oblys boıynsha bas memlekettik sanıtarııalyq dárigeri Álııa Ábdiqaıymova.
Sondaı-aq, oblysta koronavırýs ınfektsııasynyń boljamdy ekinshi tolqynyna daıyndyq kúsheıtildi. Óńirde búginde 350 mıllıon teńgeniń dári-dármek qory jasaldy.
«Dári-dármektiń dárihanalarda - 45, emhanalarda - 1 aıǵa jetetin qory bar. Epıdahýaldyń turaqtalýyna oraı ınfektsııalyq, provızorlyq, karantındik tósek oryndary 10 esege deıin qysqardy. Jaǵdaı kúrdelene tússe, 3 myń tósek orynǵa laıyqtalǵan 21 aýrýhana daıyn. Sondaı-aq, úı jaǵdaıynda em alatyndar úshin 161 mobıldi top quryldy», - dedi Á. Ábdiqaıymova.
Іndetke qarsy kúreske tartylatyn medıtsına salasynyń 3,5 myń mamanyna 2 aıǵa jetetin qorǵanysh quraly alynǵan. Ókpeni jeldetetin apparat sany 191-ge jetkizildi.