Qyzylorda oblysynda tórt túlikke jem-shóp daıyndaýdyń arnaıy jospary bekitildi

QYZYLORDA. QazAqparat - Qyzylorda oblysynda aýyl sharýashylyǵy maldaryn jem-shóp qorymen qamtamasyz etýdiń arnaıy jospary bekitildi, dep habarlaıdy QazAqparat tilshisi.

Óńirde ótken jylmen salystyrǵanda mal basynyń birshama artqany baıqaldy. Atap aıtsaq, múıizdi iri qara – 8,2, qoı men eshki – 6,5, jylqy - 14,2, túıe – 8,1 paıyzǵa kóbeıdi.

Tıisinshe, et óndirisi – 2,4, sút ónimi – 2,3, jumyrtqa 3,1 paıyzǵa artty. Bıyl Aral aýdanynda oryn alǵan tótenshe jaǵdaıǵa baılanysty tórt-túlikti qysta mal azyǵymen qamtamasyz etý úshin aýdandyq shtabtar quryldy.

«Oblys boıynsha qysqa túsetin aýyl sharýashylyǵy janýarlaryn jem-shóp qorymen qamtamasyz etýdiń arnaıy jospary bekitildi. Qysqa túsetin maldarǵa 213,6 myń tonna azyq qajet bolsa sonyń 80,9 paıyzy qamtyldy. Jaýapty mınıstrlikke mal azyǵyn daıyndaýǵa qosymsha 3,8 myń tonna dızel otynyna tapsyrys berilip, aýdandar boıynsha sharýashylyqtar bólinisindegi kestesi daıyndaldy», - dedi oblystyq Aýyl sharýashylyǵy basqarmasy basshysynyń orynbasary Qaıratbek Sársenbaev.

Jyl kóleminde oblys boıynsha 534,7 myń shartty mal basyna qys mezgiline 769,9 myń tonna azyq daıyndaý josparlanǵan bolatyn. Qazirgi tańda qajetti mal azyǵy 109,8 paıyzdy qurady.

Eske salsaq, budan buryn Qyzylorda oblysynda kúzgi egin jınaý jumysy tolyǵymen aıaqtalǵanyn jazǵan bolatynbyz.