Qyzylorda oblysynda tikushaq apatynda qaza tapqandardy eske aldy
QYZYLORDA. QazAqparat- Qyzylordada osydan on jyl buryn tikushaq apatynda qaza tapqandardy eske aldy, dep habarlady QazAqparat tilshisi.
2008 jyldyń 28 aqpanynda oblys aýmaǵyndaǵy sý tasqynynan qorǵaý maqsatyndaǵy is-sharalar barysynda Syrdarııa ózeni ústinen baqylaý úshin ushyp ótken QR TJM «Qazáýequtqarý» MM-niń «MI-8» tikushaǵy Jalaǵash aýdany aýmaǵyna qulaǵan bolatyn. «MI-8» tikushaǵy apaty alty adamnyń ómirin jalmap ketti. Sol kúni qyzmettik mindetterin oryndaý barysynda qaza bolǵandar qatarynda departament bastyǵynyń orynbasary polkovnık Qazbek Tóremanov, jýrnalıst Saǵıtjan Bermaǵambetov, ushqyshtar Vıtalıı Glazýnov, Nurlan Qumarov, Fahretdın Ońǵarbaev jáne Ǵalym Nurmaǵambetov bar edi.
Qyzylorda oblysy Tótenshe jaǵdaılar departamentiniń qyzmetkerleri jyl saıyn tikushaq apatynan mert bolǵandardy eske alady. Qaıǵyly oqıǵa oryn alǵan jerde ornatylǵan memorıaldyq taqta aldyndaǵy eske alý sharasy bir mınýttik únsizdik jarııalaýmen bastaldy. Árýaqtarǵa arnap Quran baǵyshtaldy.
Budan soń Tótenshe jaǵdaılar departamentiniń qyzmetkerleri men qurban bolǵan azamattardyń týystary Jalaǵash aýdanynda ornalasqan «Urpaqqa úlgi esimder» memorıaldyq taqtasyna gúl shoqtaryn qoıdy.
