Qyzylorda oblysynda teplovoz ben avtokólik soqtyǵysyp, bir adam aýrýhanaǵa tústi

QYZYLORDA. QazAqparat - Qyzylorda oblysynda jeńil kólik teplovozben soqtyǵysyp, jaraqat alǵan bir adam aýrýhanaǵa jatqyzyldy, dep habarlaıdy QazAqparat tilshisi.

Oqıǵa 29 mamyrda saǵat 14:14 shamasynda boldy. Sol ýaqytta Aral aýdandyq polıtsııa bóliminiń ýchaskelik polıtsııa ınspektorynan habarlama túsken. Onda Qamystybas eldi mekeniniń tusynda rettelmeıtin (kezekshisiz) temirjol ótkelinde VAZ avtokóligi jol erejesin saqtamaı, teplovozben soqtyǵysqany aıtylǵan.

«Bul oqıǵa Aral aýdandyq polıtsııa bóliminiń aqparattardy esepke alý kitabyna tirkeldi. Tekserý barysynda Qamystybas eldi mekeniniń turǵyny bir jolaýshysymen temirjol ótkelinde jol-kólik oqıǵasyna ushyraǵany anyqtaldy. Kóliktiń jolaýshysy jeńil dene jaraqatymen Qazaly aýdandyq aýrýhanasyna jatqyzyldy. Avtokólik júrgizýshisine qatysty QR Ákimshilik quqyq buzýshylyq týraly kodeksiniń 607-baby jáne 610-babymen hattama rásimdeldi», - dep málim etti Qyzylorda oblystyq polıtsııa departamentinen.

Eske salsaq, Qyzylordada alaıaqtyq qylmysynyń basym bóligi ınternet arqyly jasalǵan.