Qyzylorda oblysynda tamaqtaný obektileri táýlik boıy jumys isteı alady
Qyzylorda oblysy koronavırýstyq ınfektsııasynyń epıdemologııalyq ahýaldy baǵalaý matrıtsasynda 10 mamyrdan bastap «jasyl» aımaqta tur. Osyǵan baılanysty birqatar shekteý sharalaryn jeńildetý týraly oblystyń Bas memleketik sanıtarııalyq dárigeriniń №14 jańa Qaýlysy qabyldandy.
Jańa qaýlyda birqatar karantındik shekteýler jeńildetildi. Biraq kúsheıtilgen sanıtarııalyq-dezınfektsııalyq talap saqtalýy tıis. Sonymen, banket zaldardyń jumysyna tek as berý úshin ruqsat berildi. Biraq syıymdylyǵy 30 paıyzdan jáne 50 orynnan asyrmaý qajet. Al dinı obektiler jumysyna toltyrylýyn 30 paıyzdan asyrmaý talaby qoıyldy.
Qaýly negizinde 50 adamnan asyrmaı mádenıet obektileriniń, toltyrylýyn 30 paıyzdan asyrmaı teatrlar, kınoteatrlar, kontsert zaldary, fılarmonııalar, bılıard, kompıýterlik klýbtar, boýlıng, balalardyń oıyn-saýyq ortalyqtarynyń jumysyna ruqsat etildi. Sondaı-aq, endi turǵyndar sporttyq saıystardy tamashalaı alady. Biraq kórermender 20 paıyzdan aspaýy kerek. Balalardy saýyqtyrý uıymdarynyń qyzmetine, qoǵamdyq tamaqtaný obektileriniń jumysyna toltyrylýy 50%-ǵa deıin, biraq 50 orynnan asyrmaý talabymen jumys kestesin saǵat 7.00-den 2.00-ge deıin, ashanalar tıpi boıynsha qoǵamdyq tamaqtaný obektileriniń jumysyn táýlik boıy uıymdastyrýǵa bolady.
«Jańa qaýlyǵa sáıkes qoǵamdyq oryndarda kalıandy paıdalanýǵa, oıyn-saýyq is-sharalaryn, kórmelerdi, forýmdardy, konferentsııalardy, sondaı-aq otbasylyq, saltanatty, estelik is-sharalardy (banketter, úılený toılary, mereıtoılar), onyń ishinde úıde jáne adamdar kóp jınalatyn ózge de is-sharalardy ótkizýge, býkmekerlik keńselerdiń qyzmetine, túngi jáne oıyn klýbtarynyń, karaoke qyzmetine, merekelik korporatıvterdi uıymdastyrý men ótkizýge tyıym salynady. Karantın talaptary jeńildetilgenmen saqtyq sharalaryna mán bereıik», - dedi oblystyń Bas memlekettik sanıtarııalyq dárigeri Dınara Jańabergenova.
Qaýlymen engizilgen bul ózgerister 2021 jylǵy 17 mamyrdan bastap kúshine enedi.
Eske salsaq, búginge deıin Qyzylorda oblysynda 74 myń adam koronavırýsqa qarsy vaktsına saldyrdy.
