Qyzylorda oblysynda Syrdarııa jaǵalaýynan er adamnyń máıiti tabyldy

QYZYLORDA. QazAqparat - Qyzylorda oblysynyń Jalaǵash aýdany tusyndaǵy Syrdarııa ózeni jaǵalaýynan belgisiz er azamattyń máıiti tabyldy, dep habarlaıdy QazAqparat tilshisi.

Oblystyq polıtsııa departamentiniń habarlaýynsha, bul boıynsha qylmystyq is tirkelip, sotqa deıingi tergep-tekserý bastaldy.

«Máıit uzaq ýaqyt sýda jatyp qalǵan. Osyǵan baılanysty tabylǵan máıittiń jeke basyn anyqtaý úshin tıisti sot saraptamasy taǵaıyndaldy. QR Qylmystyq-protsestik kodeksiniń 201-babynyń talabyna sáıkes sotqa deıingi tergep-tekserýdiń ózge derekterin jarııa etýge jol berilmeıdi», - dep málim etti departamentten.

Vedomstvo málimetinshe, qylmystyq is Qyzylorda oblysy Polıtsııa departamenti bastyǵynyń baqylaýynda.

Aıta keteıik, áleýmettik jelide tabylǵan máıit belgili kásipker Tynymbaı Bajenovtiń denesi bolýy múmkin ekeni aıtylýda. Ol 2020 jyldyń 15 aqpanynda habarsyz ketken bolatyn.