Qyzylorda oblysynda sýǵa ketken 5 adamnyń bireýi áli izdestirilýde
QYZYLORDA. QazAqparat - Sońǵy eki kúnniń ishinde Qyzylorda oblysynda 5 adamnyń sýǵa ketý deregi tirkeldi. Olardyń barlyǵy qaza bolǵan. Bul jóninde Qyzylorda oblystyq óńirlik kommýnıkatsııalar qyzmetinde ótken baspasóz máslıhatynda málim etildi, dep habarlaıdy QazAqparat tilshisi.
Qazirgi tańda Qyzylorda oblysynda óte ystyq aýa raıy qalyptasyp tur. Oblystyq tótenshe jaǵdaılar departamenti taratqan habarlama boıynsha aýa-raıy 40-45 gradýsty mańaılaıdy. Osynyń saldarynan sýǵa túsýshiler sany kóbeıgen. Degenmen olar ruqsat etilmegen oryndarda sýǵa túsken. Onyń sońy qaıǵyly jaǵdaıǵa alyp keledi. Máselen, 7-9 shilde aralyǵynda 5 adam tilsiz jaýdyń qurbanyna aınalǵan. Olardyń arasynda 4 adamnyń denesi tabyldy, 1-ýi áli de izdestirilýde. Bul oqıǵalar Shıeli aýdany Báıgequm eldi mekeni aýmaǵyndaǵy Qanqoja kóli, Qarmaqshy aýdanynyń ortalyǵy - Josaly kenti, Qyzylorda qalasy mańaıyndaǵy Jańadarııa kanalynda bolǵan.
Qaza bolǵan adamdar arasynda túngi mezgilde sýǵa túskender de kezdesedi. Onyń sońy ólimge alyp kelip soqty.
«Negizinde túnde sýǵa túsýge bolmaıdy. Mundaı jaǵdaıda sýǵa ketken adamdy izdeýdiń ózi qıyn. Taǵy bir aıtarymyz, sý aıdyny aýmaǵyna kishkentaı balalar men oqýshylardy alyp barmasa eken. Sýdyń keı jerleriniń aǵysy qatty bolatynyn da umytpaǵanymyz abzal», - deıdi oblystyq jumyldyrý daıyndyǵy basqarmasy basshysynyń orynbasary Ǵabıt Jańabaev.
Jalpy, jyl basynan beri Syr óńirinde 8 adam sýǵa ketken. Onyń ishinde 2-ýi bala. Qutqarýshylar 13 adamnyń ómirin saqtap qaldy.
