Qyzylorda oblysynda sýarmaly alqapty 300 myń gektarǵa arttyrý kózdelýde
QYZYLORDA. QazAqparat - Qyzylorda oblysynda sýarmaly jerler kólemin arttyrý baǵytynda nátıjeli jumystar atqarylatyn bolady, dep habarlaıdy QazAqparat tilshisi.
Syr óńirinde sýarmaly jer alqaptaryn 300 myń gektarǵa deıin arttyrý mejelengen. 2018 jyldyń 1 qarashasyna deıingi esep boıynsha qazirgi tańda oblysta 249,8 myń gektar sýarmaly jer tirkelgen. Tıisti sala mamandary osy baǵytta zertteý sharalaryn júrgizdi. Olar 116 myń gektar jerdi aınalymǵa qosýǵa múmkindik bar ekendigin zerdeledi. Onyń ishinde paıdalanylmaı turǵan 29 myń gektar alqapty aınalymǵa qosýǵa negiz bar.
«Ótken jyly osy joba boıynsha sý nysandaryn qujattandyrý jumystary tolyq aıaqtalyp, respýblıkalyq menshikke ótkizildi. Jobanyń tehnıkalyq-ekonomıkalyq negizdemesi ázirlendi. Onyń jalpy quny - 13,4 mlrd teńge. Joba Azııalyq Damý Bankiniń qaryz qarajaty esebinen iske asyrylatyn bolady», - deıdi Tabıǵı resýrstar jáne tabıǵat paıdalanýdy retteý basqarmasynyń basshysy Aıdar Ábdýálıev.
Bul baǵytta ekinshi múmkindik bar. Onyń nátıjesinde 87,5 myń gektar sýarmaly jańa jerlerdi anyqtaý arqyly olardy aınalymǵa qosýǵa bolady. Tabıǵı resýrstar jáne tabıǵat paıdalanýdy retteý basqarmasy mamandary bul baǵytta 51 myń gektar sýarmaly jerdi ıgerý máselesin tıisti oryndar nazaryna usyndy.
«QazSýShar» kásipornynyń aqparatyna sáıkes sýarmaly jer retinde belgilengen 6 aýqymdy jer bar. Atap aıtqanda, bul tizimge Túgisken, Jańaqorǵan-Shıeli, Qyzylorda oń jaǵa, Qyzylorda sol jaǵa, Qazaly oń jaǵa jáne Qazaly sol jaǵa alaby engizilgen. Olardyń jalpy kólemi 223 myń gektardy quraıdy. Mamandardyń aıtýynsha, bulardyń 34 paıyzy paıdalanylyp jatqan joq. Osy jerler men qosymsha jańa alańdardy aınalymǵa qosýǵa múmkindik bar. Aldaǵy ýaqytta atalmysh aýmaqtarda ónimdiligi joǵary, sýdy az qajet etetin, suranysqa ıe daqyldar egý josparlanyp otyr.
