Qyzylorda oblysynda sý tasqyny qaýpi bar
QYZYLORDA. QazAqparat - Qyzylorda oblysynda sý tasqyny qaýpi bar. Osyǵan oraı jergilikti jurtshylyq Syrdarııa ózeninde kóktemgi seń júrýine baılanysty úlken daıyndyq jasap jatyr, dep habarlaıdy QazAqparat tilshisi.
Qazirgi tańda «Shardara» sý qoımasyna 4 mlrd tekshe metrden astam sý jınalǵan. Atalmysh sý qoımasynan tómengi bólikke sekýndyna 700 tekshe metrden sý jiberilip jatyr. Búgingi kúnderi onyń teń jartysyna jýyǵy «Kóksaraı» sý rettegishi arqyly alynady. Qyzylorda oblysy aýmaǵyna sekýndyna 390 tekshe metr sý kelýde.
Syrdarııa ózeninde muz ustasý jaǵdaıy árkelki. Darııa betindegi muz oblystyń soltústik bóiligindegi Jalaǵash, Qarmaqshy, Qazaly, Aral aýdandarynda ańǵarylady. Ondaǵy darııa betindegi muzdyń qalyńdyǵy 30-50 santımetrdi quraıdy.
Oblystyq tótenshe jaǵdaılar departamenti mamandary sý basý qaýpi bar eldimeken turǵyndaryna únparaqtar taratyp, túsindirme jumystaryn júrgizip keledi. Darııadaǵy sý tasqynynyń aldyn alý maqsatynda kúndelikti monıtorıng jasalady.
«Qazir joǵarydan keletin sý mólsherin qaýipti jaǵdaıdan asyrmaý jóninde tıisti oryndarmen kelisip otyrmyz. Osy maqsatta «Shardara» men «Kóksaraıdan» tómenge baǵyttalatyn sý deńgeıiniń kestesi qolǵa alynyp otyr. Oblysymyzǵa keletin artyq sýdy bosatatyn magıstraldy kanaldar, kól júıeleri daıyn tur», - dedi Qyzylorda oblysynyń jumyldyrý daıyndyǵy basqarmasynyń basshysy Asylbek Shámenov.
Aıta keterligi, aldaǵy ýaqytta Qyzylorda oblysynda tasqyn sý jınaıtyn 6 sý qoıma salý josparlanyp otyr. Onyń ishinde eń aýqymdylary - 1,5 mlrd tekshe metr sý jınaıtyn Qaraózek jáne 600 mln tekshe metr sý jınaıtyn Kúmisketken sý qoımalary. Bul is agroónerkásiptik keshendi damytýdyń memlekettik baǵdarlamasy aıasynda qolǵa alynady.
