Qyzylorda oblysynda sportpen turaqty shuǵyldanýshylar 254 myń adamnan asty
Óńirde dene shynyqtyrý jáne sportpen turaqty shuǵyldanýshylar sany artyp keledi. Búginde atalǵan kórsetkish 31,3 paıyzǵa jetip, 254 myń adamnan asty. Bul maqsatta 282 sport nusqaýshy 138 eldi mekende qyzmet atqarady. Aýyldyq jerlerde 42 myń adamdy turaqty túrde dene shynyqtyrýmen aınalysady. Sondaı-aq, oblystyń barlyq aýdan ortalyǵy men Qyzylorda qalasyndaǵy 8 dene shynyqtyrý-saýyqtyrý klýbynda salaýatty ómir saltyn ustanýǵa kóńil bólgender qatary arta tústi.
«Bıyl aımaqta túrli deńgeıdegi saıystar ótkizýge jol ashyldy. Osy maqsatta oblys aýmaǵynda jyl basynan beri 564 buqaralyq sporttyq is-sharalar ótkizilip, oǵan 53 myńnan astam adam qatysty. Atap aıtqanda, balalar-jasóspirimder sport mektepteri arasynda oblys birinshiligi uıymdastyryldy. Áýesqoılar arasynda jaýynger-ınternatsıonalıst Batyrjan Shalǵynbaevty eske alýǵa arnalǵan respýblıkalyq dástúrli týrnır bıyl da jalǵasyn tapty», - dedi oblystyq dene shynyqtyrý jáne sport basqarmasynyń basshysy Jaqsylyq Ospanov.
Basqarma basshysynyń aıtýynsha, óńirde velosporttan elimizden shyqqan tuńǵysh álem chempıony, Marat Satybaldıev, QR eńbegi sińgen jattyqtyrýshy Jetes Súleımenovtiń júldelerine arnalǵan respýblıkalyq týrnırler kópshilik qyzyǵýshylyǵyn týǵyzyp keledi. Al qazaq kúresinen oblystyq «Altyn belbeý» jarysy on jyldan beri talaı talanttyń tanylýyna jol ashty. Fýtboldan QR eńbek sińirgen jattyqtyrýshysy Tımýr Segizbaevty eske alýǵa arnalǵan jarys ta oqýshylar arasynda keńinen tanymal.
Aıta keterligi, jyl basynan beri kóptegen sport túrlerinen 8 Qazaqstan Respýblıkasynyń chempıonaty men kýbogy uıymdastyryldy. Máselen, jastarymyz sambo, gandbol, sporttyq bı, velosporttan báeske kórigin qyzdyrsa, aýyr atletıkadan jarys onlaın júıede 2 ret ótkizildi. Sondaı-aq, respýblıkalyq 20 jáne oblystyq deńgeıde 84 birinshilik uıymdastyryldy.
Oblysta halyqtyń sporttyq nysandarǵa qoljetimdiligin arttyrý maqsatynda sport keshenderiniń sany artyp keledi. Sol arqyly «Aýyl - el besigi» baǵdarlamasy aıasynda 5 sport kesheniniń qurylysy qolǵa alynady. Qýanarlyǵy, «Samruq» korporatıvtik qorynyń demeýshiligimen Qyzylorda qalasyna qarasty J.Mahambetov aýyldyq okrýginen kópfýnktsıonaldy sport kesheniniń qurylysy boı kóteredi. Búgingi kúnderi «Nursát» tennıs ortalyǵy janynan 4 jabyq tennıs korty ashylsa, baıdarka jáne kanoede esý bazasy el ıgiligine aınaldy.
«Oblysta sport rezervin ázirleý baǵytynda túrli mekemeler qyzmet atqarýda. Atap aıtqanda, olardyń qatarynda balalarǵa arnalǵan mektep-ınternat-kolledji, oblystyq joǵary sport sheberligi mektebi, olımpıadalyq daıarlaý ortalyǵy jáne 21 balalar men jasóspirimder sport mektebi jas urpaqty salaýatty ómir saltyna tárbıelep keledi. Bul mekemelerde 20 myńnan astam óren sportyń 47 túrimen tegin shuǵyldanady», - dedi basqarma basshysy bizben áńgimesinde.
Balalar-jasóspirimder sport mektepterinde, sport klýbtarynda dene shynyqtyrý jáne sportpen turaqty shuǵyldanatyn 7-18 jas aralyǵyndaǵy balalar men jasóspirimder sany 29 876 adamǵa jetti. Ol 17,6 paıyzdy quraıdy.
«Oblys sportshylary el birinshiligi men kýboktarynda 700 medal jeńip aldy. Olardyń 211-i altyn, 208-i kúmis, 281-i qola. Al álem jáne Azııa chempıonattarynda túrli deńgeıdegi 47 medalǵa qol jetti. Nátıjesinde 35 QR sport sheberi, 278 QR sport sheberligine úmitker, 57 birinshi cporttyq razrıadty sportshylar daıyndaldy», - dedi basqarma basshysy.
Aqtaý qalasynda dzıýdodan ótken Azııa kýbogynda Maǵjan Shamshadın chempıon atansa, Saltanat Sultanbekova, Baýyrjan Jaýyntaev pen Aıbek Serikbaev úzdik úshtikti túıindedi. Al Úndistannyń Nıý-Delı qalasynda stend atýdan ótken Álem kýbogynda Aıjan Dosmaǵambetova ekinshi, Maksım Kolomoets qolúshinshi orynǵa taban tiredi. Almaty qalasynda kúres túrlerinen Azııa chempıonatynda Aıdos Sultanǵalı grek-rım kúresinen altyn alsa, áıelder kúresinen Asylzat Saǵymbaı qola júldeger atandy. Bokstan jastar arasynda ótken álem chempıonatynda Ásel Saǵatova, aýyr atletıkadan Azııa chempıonatynda Aızada Múptilda qola júldege qol jetkizdi. Para paýerlıftıngten Álem kýbogynda Stanıslav Shakıev chempıon atansa, Álem kýbogynda Kabıra Asqarova úzdik úshtikten kórindi. Al aýyr atletıkadan jastar arasyndaǵy álem chempıonatynda Rahat Bekbolat pen Aısamal Sansyzbaeva altyn medal ıelendi. Al jekpe-jek saıysynan Álem chempıonatynda Baqytbek Úmbetqulov qola júldeger atandy.
«Jaqynda ǵana aıaqtalǵan Tokıo Olımpıadasynda oblys atynan bokstan Qamshybek Qońqabaev, erkin kúresten Dáýlet Nııazbekov jáne karate-dodan Móldir Jańbyrbaı el namysyn abyroımen qorǵady. Bokstan ulttyq quramanyń kapıtany Qamshybek Prezıdentimizdiń qolynan Qazaq eliniń Kók týyn alyp, Olımpıada oıyndarynyń qola júldegeri atandy. Bul – bizdiń Syr sporty úshin úlken maqtanysh», - dedi basqarma basshysy.
Endi 24 tamyz jáne 5 qyrkúıek aralyǵynda Tokıo qalasynda ótetin HVI jazǵy Paralımpıada oıyndarynda oblystan Daıana Fedosova para-dzıýdo sport túrine synǵa túsedi.
