Qyzylorda oblysynda sońǵy úsh aıda 124 mln. teńgeniń jalaqy qaryzy qaıtaryldy

Bul týraly oblys ákiminiń baspasóz qyzmetinen habarlady.

«Sońǵy úsh aı ishinde Qyzylorda oblysyndaǵy kásiporyn, kompanııa, óndiris oryndarynyń jumysshylar aldyndaǵy jalaqyǵa qaryzy birneshe esege qysqardy. Jyl basynda oblys boıynsha 31 kásiporynnyń eńbekaqyǵa 224 mln. teńgeden astam bereshegi bolsa, búgingi kúni jalaqyǵa qaryz 100 mln. teńgege deıin azaıdy», - delingen habarlamada.

Buǵan deıin oblys aýmaǵyndaǵy «Batys Eýropa - Batys Qytaı» kólik dáliziniń qurylysyna qatysyp kelgen «Impreza» aktsıonerlik qoǵamynyń jalaqyǵa qaryzy qordalanyp qalǵan edi. Kompanııanyń 4 aı ishinde 88 jumysshyǵa bereshegi 37,6 mln. teńgege jetken. Osyny negizge alǵan oblystyq baqylaý jáne áleýmettik qorǵaý departamenti tekserip, eńbekaqyny májbúrlep óteý jóninde sotqa talap aryz túsirdi. Sottyń sheshimimen kompanııaǵa tıesili jol tehnıkasyna arest salynyp, ózge múlikteri satyldy. Sóıtip, búgingi kúni eńbekaqyǵa bereshektiń 30 mln. teńgesi óndirilip, jalaqynyń negizgi bóligi qaıtaryldy. Qalǵan 7,6 mln. teńge bereshek qarjy jýyq arada óteledi.

Odan bólek, munaı salasynda jumys istep jatqan «Qumkól-Servıs» JShS-niń 325 jumysshysyna eki aılyq 29,9 mln. teńge jalaqy qaıtaryldy. Qazir oblys boıynsha ózge de shaǵyn kásiporyndardyń jumysshylarǵa qaryzyn tóletý isi júrip jatyr.