Qyzylorda oblysynda sońǵy 3 jylda óńdeý ónerkásibi turaqty ósim kórsetýde
QYZYLORDA. QazAqparat - Qyzylorda oblysynda sońǵy 3 jylda óńdeý ónerkásibi turaqty ósim kórsetýde. Esepti kezeńde bul salada óndirilgen ónim kólemi 15%-ǵa artyp, 117 mlrd. teńgeni qurady. Jalpy ónerkásiptegi úlesi - 18,1%-ǵa jetip, sońǵy 3 jylda 3,1 esege ulǵaıǵan.
Kórsetkish boıynsha oblys respýblıkada ekinshi orynda tur. Bul týraly Qyzylorda oblysynyń Óńirlik kommýnıkatsııalar qyzmetinde ótken brıfıngte oblystyq ındýstrııalyq-ınnovatsııalyq damý basqarmasynyń basshysy Rınat Sultangereev málimdedi, - dep habarlady QazAqparat HAA tilshisi.
Basqarma basshysynyń aıtýynsha oblys aýmaǵynda 85 kelisimsharttyń negizinde keń taralǵan paıdaly qazbalardy barlaý nemese óndirýmen 49 jer qoınaýyn paıdalanýshy jumys júrgizýde. 2016 jyly munaı jáne ýran salasyndaǵy kompanııalar oblystyń áleýmettik-ekonomıkalyq damýyna 2,6 mlrd. teńgeden astam qarjy bólgen.
Sondaı-aq, mıneraldy-shıkizattyq bazany keńeıtý jáne jańa kenishterdi ıgerý maqsatynda jańadan 15 kelisimshart jasaldy. Al, ınvestıtsııa kórsetkishine kelsek, 2016 jyldyń 12 aıynda negizgi kapıtalǵa salynǵan ınvestıtsııa kólemi 215,3 mlrd.teńge qurap, naqty kólem ındeksi 86,9%-dy qurap otyr.
Investıtsııa kórsetkishiniń tómendeýi «Batys Eýropa - Batys Qytaı», «Beıneý-Shymkent», «Sekseýil-Jezqazǵan» jáne «QazTransGazAımaq» AQ-nyń gazdandyrý baǵdarlamasy sekildi 4 iri ınvestjobanyń aıaqtalýyna baılanysty bolyp otyr. 2016 jyly birinshi besjyldyqta iske asyrylǵan 17 jobanyń 13 jobasy turaqty túrde ónim óndirýdi qamtamasyz etip, «josparly qýattylyqty» 60-100% aralyǵynda meńgerdi.
Jańa ınvestorlarmen jumysymyzdyń nátıjesinde Jalaǵash aýdanyndaǵy mııa tamyryn óńdeý zaýyty jumysyn qaıta bastap, alǵashqy 20 tonna ónimi eksportqa joldady. Shıeli aýdanyndaǵy dál osyndaı zaýytty iske qosý máselesi pysyqtalýda. Qazir ınvestorlar zaýyttyń qural-jabdyqtaryna taldaý jasaýda.
