Qyzylorda oblysynda soqtyǵysqan avtobýstarǵa qatysty qosymsha málimetter jarııa etildi

QYZYLORDA. QazAqparat - Qyzylorda oblysynyń Qarmaqshy aýdanynda soqtyǵysqan eki jolaýshylar avtobýsyna qatysty ótkizilgen brıfıngte qosymsha málimetter jarııa etildi, dep habarlaıdy QazAqparat tilshisi.

Jolaýshylar avtobýsynyń biri Qazalydan oblys ortalyǵyna qaraı bet alsa, ekinshisi Qyzylordadan Qarmaqshyǵa bara jatqan. Eki avtobýstyń ishinde barlyǵy 86 adam bolǵan. Oqıǵa ornyna dereý jetken tótenshe jaǵdaılar salasynyń qutqarýshylary kólikte qysylyp qalǵan 5 adamdy alyp shyqty. Olardyń 2-i oqıǵa ornynda qaıtys bolǵan. Qaıtys bolǵandardyń biri 1964 jyly dúnıege kelgen bolsa, ekinshisi 1997 jylǵy oblys turǵyny. 2011 jylǵy bala Qarmaqshy aýdandyq aýrýhanasy jansaqtaý bólimine jetkizilgenmen dárigerler onyń ómirin saqtap qala alǵan joq 

«Eki avtobýstaǵy jolaýshylar negizinen Qazaly jáne Qarmaqshy aýdanynyń turǵyndary. Jol-kólik oqıǵasy týraly habar alǵannan keıin apat ornyna Qarmaqshy aýdany ákimdiginiń mamandary, oblystyq densaýlyq saqtaýǵ júmyldyrý daıyndyǵy basqarmalary jáne jergilikti polıtsııa qyzmetiniń, tótenshe jaǵdaılar jáne ishki ister departamentterini basshylary bardy.  Oqıǵa ornynda jergilikti polıtsııa qyzmetiniń 34 qyzmetkeri, tótenshe jaǵdaılar departamentiniń 34 mamany, medıtsına salasynyń 130 qyzmetkeri jumyldyryldy. Medıtsına mamandarynyń arasynda 16 dáriger bar. Sondaı-aq, onda 12 jedel járdem brıgadasy qyzmet atqardy. Jol apaty saldarynan zardap shekken 74 jolaýshyǵa alǵashqy medıtsınalyq kómek kórsetildi. Olardyń arasynda 29-y Qarmaqshy, Jalaǵash aýdandyq aýrýhanalary men oblystyq medıtsına ortalyǵyna jetkizildi», - dedi oblystyq jumyldyrý daıyndyǵy basqarmasy basshysynyń orynbasary Ǵabıt Jańabaev.

Oblystyq densaýlyq saqtaý basqarmasy basshysynyń orynbasary Oljas Іlııasov oqıǵa ornyna 3 sanıtarlyq avıatsııa qyzmeti barǵanyn aıtyp ótti. Dárigerler 45 jolaýshyǵa alǵashqy medıtsınalyq qyzmet kórsetken. Olarǵa ambýlatorlyq em taǵaıyndaldy. Qazirgi tańda 29 aýrýhanada em qabyldasa, 49-y úıine qaıtarylǵan.

«Qazir jol apatynyń sebep saldary anyqtalyp jatyr. Jolda júrý barysynda taıǵaq bolý sekildi eshqandaı qıyndyq bolmaǵany anyqtaldy. Avtobýs júrgizýshileriniń qujattary durys, barlyǵy tıisti talaptarǵa saı keledi. Qazir sotqa deıingi tergeý amaldary júrgizilýde», - dedi Qyzylorda oblysynyń Polıtsııa departamentiniń jergilikti polıtsııa qyzmeti basqarmasynyń bastyǵy Baýyrjan Ibraev.

Esterińizge sala ketelik, Syr óńirinde mundaı jol apaty qazan aıynyń basynda da oryn alǵan bolatyn.