Qyzylorda oblysynda smartfon shynylary shyǵarylmaq

        BEIJІŃ. QazAqparat - Qyzylordada smartfondar men gadjetterge arnalǵan ýltrajuqa áınekter shyǵarý josparlanýda. Bul týraly Qytaı eline saparynyń qorytyndysy boıynsha jýrnalıstermen kezdesken Qyzylorda oblysynyń ákimi Qyrymbek Kósherbaev aıtty, dep habarlady QazAqparattyń Qytaı elindegi tilshisi.

Búginde  qurylysy júrip jatqan tompanajdy tsement zaýyty bıylǵy jyldyń jeltoqsan aıynda paıdalanýǵa beriledi. Al, shyny zaýyty Astana kúni merekesi qarsańynda iske qosylmaq.

«Qyzylorda oblysynyń delegatsııasy Qytaı elinde iri ınvestıtsııalyq kompanııa ókilderimen kezdesti. Joǵary tehnologııalyq alty joba boıynsha kelisimge keldik. Mysaly, shyny zaýytynyń ekinshi kezeńi qolǵa alynyp, smartfondar, planshetter men gadjetterge arnalǵan ýltrajuqa shynylar shyǵaramyz. Bul Qazaqstan ekonomıkasy úshin asa mańyzdy»,- dedi Q. Kósherbaev.

Ákimniń aıtýy boıynsha, kelisilgen jobalardy iske asyrý úshin ekijaqty jumys toby qurylǵan. Aldaǵy ýaqytta naqty kelisimderge qol qoıylmaq. Sondaı-aq, Shenchjen qalasynda «Huawei» kompanııasymen «Aqyldy qala» jobasy boıynsha memorandýmǵa qol qoıylady. Bul kompanııa búginde álemge jaqsy tanymal. Osyndaı «Aqyldy qala» jobasyna Syrdarııanyń sol jaǵalaýynda boı kóterip jatqan qala da enetin bolady.

Esterińizge sala keteıik, keshe Q. Kósherbaev qytaılyq CNEEC kompanııasyn Syr eline shaqyrǵan bolatyn. Kún jáne gıdroelektrstantsııasy men qoqys óńdeý zaýytyn salý boıynsha jobalardy iske asyrý, sonymen birge «Aqyldy qala» júıesin damytý úshin qytaılyq kompanııa Syr eline kelýi múmkin.

Búgin ákim qytaılyq  China Triumph International Engineering Co, Ltd, men «Gezhouba Group Cement Co., Ltd.» kompanııalarynyń basshylarymen kelissózder júrgizdi.