Qyzylorda oblysynda shekara zastavasy men mektepke Janqoja batyrdyń esimi berildi

QYZYLORDA. QazAqparat-QR Úkimetiniń Qaýlysymen  «Ońtústik» óńirlik basqarmasy 2019 áskerı bóliminiń «Qyzylqum» shekara zastavasyna jáne Qarmaqshy aýdanyndaǵy №269 orta mektepke ult-azattyq qozǵalysynyń kórnekti ókili, otarshyldarǵa qarsy Syr boıyndaǵy halyq kóterilisiniń basshysy, qazaq dalasynyń qas batyry - Janqoja Nurmuhammedulynyń esimi berildi. Bul týraly QazAqparat habarlady.

Shekara zastavasyna Janqoja batyrdyń esimin berý saltanatty sharasyna Qyzylorda oblysynyń ákimi Qyrymbek Kósherbaev,  QR UQK tóraǵasynyń orynbasary, Shekara qyzmetiniń dırektory, general-maıor Darhan Dilmanov, QR Parlamenti Májilisiniń depýtaty Baqytbek Smaǵul qatysty.

«Janqoja Nurmuhammeduly óz dáýiri artqan uly júkti qaıyspaı kóterip, el, halyq aldyndaǵy paryzyn adal atqaryp ketken perzentter sanatynda. Ozbyr da óktem jaýǵa qarsy azattyq týyn kóterip, ómiriniń aqyrǵy kúnderine deıin attan túspegen batyrdyń ańsaǵan armanyna Elbasy bastaǵan búgingi urpaq - biz jettik.  Sondaı-aq, Janqoja babamyzdyń urpaǵyna «Meni Qoqanmen shekaraǵa qoıyńdar, jaı jatqansha aıaǵymmen qazaqtyń qasıetti jerin tirep jataıyn» dep amanat qaldyrǵany týraly tarıhta derekter bar. Áli kúnge batyr babamyz shekarashylarmen birge el qaýipsizdigin qorǵap turǵandaı. Kúni-túni elimizdiń, óńirimizdiń tynyshtyǵy men qaýipsizdigin qorǵap júrgen shekarashylarymyzǵa bul asqaq rýh, aıbat berip, qaırattandyryp, jigerlendire túseri sózsiz», - dedi  oblys ákimi Q.Kósherbaev.

Sonymen birge QR UQK tóraǵasynyń orynbasary, shekara qyzmetiniń dırektory Darhan Dilmanov jáne QR Parlamenti Májilisiniń depýtaty Baqytbek Smaǵul shekarashylardy zastavaǵa Janqoja batyrdyń esiminiń berilýimen quttyqtady.

Janqoja Nurmuhammeduly - 18-19 ǵasyrda Syr boıy men Aral teńizi aımaǵyndaǵy halyqtyń ult-azattyǵy jolyndaǵy kúresiniń qaharmany. Ol - ońtústikte Qoqan men Hıýa handyǵynyń shapqynshylyǵyna, batysta Reseı patshalyǵynyń otarlaý saıasatyna qarsy qozǵalystardy uıymdastyrǵan dańqty qolbasshy.

Esterińizge sala keteıik, 2014 jyl batyrdyń týǵan jerinde - Qyzylorda oblysynyń Qazaly aýdanynda «Janqoja Nurmuhammeduly jyly» dep jarııalandy. Halyq batyrynyń 240 jyldyǵy  keń kólemde atalyp ótildi. Qyzylorda qalasynda batyrdyń eskertkishi ornatyldy.