Qyzylorda oblysynda sharýalar jem men shóptiń qymbattyǵyn aıtady
Oblystyq aýyl sharýashylyǵy basqarmasynyń málimeti boıynsha 1 tamyzǵa deıin óńirde 426,8 myń sıyr, 899,7 myń qoı men eshki, 224,9 myń jylqy, 63,7 myń túıe jáne 125,2 myń bas qus tirkelgen.
Bıyl mal qystatý úshin qoldaǵy múmkindik kózderin eskere otyryp, 919 myń tonna shóp, 190,2 myń tonna jem, 152,2 myń tonna saban, 6 myń tonna súrlem daıyndaý jumystary júrgizilip jatyr. Shóptiń 230 myń tonnasy jońyshqa bolsa, qalǵan bóligi 689 myń tonnasyn shabyndyqtaǵy tabıǵı shópter men qamys orý arqyly qamtamasyz etiledi.
«Bıyl jem-shóp baǵasy birshama qymbat. Jońyshqany eginshiler 800-1000 teńgege satady. Al bir keli jemniń baǵasy – 90-100 teńge. Al bazarda mal baǵasy arzandap ketken. Byltyr buzaýly sıyr 300 myń teńge tursa, qazir 220-250 myń teńgeden aspaıdy. Bul tórt túlik ósirýmen aınalysatyn sharýa adamyna edáýir salmaq bolyp tur.
Men Qyzylorda qalasyna qarasty Mahanbetov aýylynda sharýa qojalyǵynda sıyr, jylqy ósirýmen aınalysamyn. Jerdiń jutań bolýyna baılanysty qyr betkeıge kóship keldik. Sońǵy úsh-tórt jyldan beri qurǵaqshylyq baıqalady. Jaýyn-shashyn az. Sodan beri qysta da aýyl mańyndaǵy qoramyzǵa qaıtqan joqpyz. Bıyl da kóktemde jaýyn-shashyn az jaýdy. Aldymyzda qys kele jatyr. Mal kúıi bolsyn degen nıetpen nesıe alýǵa májbúrmiz. Shamamyz kelgenshe shóp jınap jatyrmyz. Ázirge jem alýǵa jaǵdaı joq», - dedi «Nur Bereke M» sharýa qojalyǵynyń basshysy Maqsat Aqmyrzaev.
Basqarma málimeti boıynsha, qazirge deıin oblys boıynsha 769,4 myń tonna shóp jınaldy. Nátıjesinde jospardyń 83,7%-y oryndaldy. Odan bólek 61,4 myń tonna jem daıyndaldy, bul – qajettiliktiń 32,3%-y .
Eske salsaq, qyzylordalyq jastarǵa kásipkerlikti damytý úshin 70 mln teńge beriledi.
