Qyzylorda oblysynda sáýlet eskertkishteriniń 3D-kartasy jasaldy

Qyzylorda oblysynyń sáýlet eskertkishteriniń 3D-kartasyna qola dáýirinen búgingi kúnge deıingi  150 eskertkishtiń vırtýaldy úlgileri -  60 arheologııa eskertkishi jáne 90 sáýlet eskertkishi kiredi. Qyzylorda oblysynyń aýmaǵynda 30 respýblıkalyq jáne 256 jergilikti mańyzǵa ıe 286 eskertkish bar.

«Bul - Ortalyq Azııa úshin tarıhı jáne mádenı eskertkishterdi qalpyna keltirýge baǵyttalǵan biregeı joba. Eń ozyq jabdyqtar men tehnologııalardyń kómegimen barlyq nysandardyń qujattamasy daıyndalǵan. Osylaısha tanymdyq tarıhı anyqtama ǵana emes, eskertkishterdi egjeı-tegjeıli zertteýge arnalǵan asa dáldikke negizdelgen qural bolmaq. Bolashaqta eskertkishterdiń derekter bazasy keńeıtiledi. Oqýshylar men stýdentterdi kvest jáne basqa da oıyn túrleri arqyly tartý úshin baǵdarlamalyq ónimdi ázirleýdi josparlap otyrmyz. Qazir túrik áriptesterimiz qyzyǵýshylyq tanytýda», - dedi joba avtory, Halyqaralyq Ortalyq Azııa zertteý ınstıtýtynyń dırektory Dmıtrıı Voıakın.

Onyń aıtýynsha, 3D-kartany daıyndaý kezinde eskertkishterdiń dáldigi joǵary úsh ólshemdi úlgilerin jasaý úshin 70 mıllıonnan astam polıgon ázirlendi.

«Aımaqtyń mádenı eskertkishteriniń 3D-kartasy - «vvirtualmap.xyz» ınteraktıvti veb - resýrsyn qurý úshin 33 000-nan astam sýret, ejelgi qalashyqtardaǵy 4000-nan astam sýret, 40 000-nan astam aerofotosýretter jáne 13 saǵattan asatyn pılotsyz ushý apparattarynan beıne túsirilimder men 450-den asa jáne jerden 1000-nan astam panoramalyq sýret jasaldy», - dedi D.Voıakın.

Karta arnaıy saıtta usynylatyn bolady. Qazirgi ýaqytta tolyqtyrý jumystary júrgizilýde, 2019 jyldyń qańtar aıynda qoljetimdi bolady dep josparlanýda.

Esterińizge sala ketelik, budan buryn Syr óńirinde jyraýlyq óner dáripteletinin habarlaǵan edik. Sondaı-aq, Qyzylordada Qobyz kúni atap ótilýi múmkin ekeni aıtyldy. Sondaı-aq aldaǵy ýaqytta Qyzylordada Rýhanı muralar mýzeıi ashylmaq.