Qyzylorda oblysynda sanıtarııa erejesin buzǵan sýmen jabdyqtaý obektilerine 11 aıyppul salynǵan

QYZYLORDA. QazAqparat – Qyzylorda oblysynyń sýmen jabdyqtaý obektilerine sanıtarııa erejelerin buzǵany úshin 458,3 myń teńgege 11 aıyppul salyndy, dep habarlaıdy QazAqparat Sanıtarııalyq-epıdemıologııalyq baqylaý komıtetine silteme jasap.

Qyzylorda oblysynyń sanıtarııalyq-epıdemıologııalyq baqylaý departamenti 2020 jyly 87 sýmen jabdyqtaý obektisin erekshe tártip boıynsha tekserdi. «Ulttyq saraptama ortalyǵy» oblystyq fılıaly mamandary ortalyqtandyrylǵan sý júıesinen 2 024 synama alyp, sanıtarııalyq-hımııalyq kórsetkishterdi zertteldi.

«Onyń 233-i nemese 11,5% organdy leptıkalyq kórsetkish boıynsha (qurǵaq qaldyq, hlorıd, jalpy qattylyq) sáıkes kelmedi. Al mıkrobıologııalyq kórsetkishteri boıynsha 2 223 zertteý júrgizilip, 80-nen nemese 3,5%-nan sáıkessizdik anyqtaldy. Lıamblııa tsıstalaryna 130 zertteý júrgizilip, sáıkessizdik tirkelgen joq», delingen habarlamada.

Oblystyq departamenttiń málimetinshe, aýyz sý sapasynda mıkrobıologııalyq kórsetkishterdiń nasharlaýy negizinen avarııalyq jaǵdaıdy joıǵannan keıin sýmen jabdyqtaý jelisinde tazartý jáne zararsyzdandyrý is-sharalarynyń jetkiliksiz júrgizilýinen, sý torabyn qorǵaý aımaǵyn saqtaý jónindegi is-sharalardyń oryndalmaýynan oryn alǵan.

«Aýyz sý sapasynyń zerthanalyq monıtorıngi barysynda anyqtalǵan sáıkessizdikter boıynsha dezınfektsııalyq jáne jýý jumystary júrgizildi, sýdyń qaıtalama úlgisi alyndy.

Sýmen jabdyqtaý obektilerine sanıtarııalyq-epıdemıologııalyq qadaǵalaý júrgizý kezinde sanıtarııalyq erejelerdi buzǵany úshin 7 uıǵarym berilip, 458 370 teńgege 11 aıyppul salyndy», delingen habarlamada.

Departamenttiń málimdeýinshe, 2020 jyly oblys turǵyndary arasynda sý faktoryna baılanysty ınfektsııalyq aýrýlar tirkelmegen.