Qyzylorda oblysynda Rýslan Rústemov eń kóp daýys jınady

QYZYLORDA. QazAqparat – QR Parlamenti Senatynyń depýtatyn saılaýda Qyzylorda boıynsha daýys berýdiń aldyn ala qorytyndysy jarııalandy, dep habarlaıdy QazAqparat tilshisi.

QR Parlamenti Senaty depýtaty saılaýynda oblystaǵy 147 máslıhat depýtatynyń 141-i daýys berýge qatysty. Daýys berý nátıjesinde Jorabek Nurymbetovke 18, Rýslan Rústemovke 95, Asylbek Shámenovke 27 depýtat qoldaý bildirgen.

Rýslan Rústemov 1968 jyly 13 jeltoqsanda Qyzylorda oblysy, Qarmaqshy aýdany, T. Kómekbaev aýylynda dúnıege kelgen. 1994 jyly Ál-Farabı atyndaǵy Qazaq memlekettik ulttyq ýnıversıtetin «Fılolog, qazaq tili men ádebıetiniń oqytýshysy» mamandyǵy boıynsha bitirgen.

Eńbek jolyn 1994 jyly Qyzylorda qalasyndaǵy Qyzylorda pedagogıkalyq ınstıtýtynyń «Fılologııa» oqý-ǵylymı kesheni oqytýshysy, dırektorynyń orynbasary qyzmetterin atqarǵan.

1997-2002 jyldar aralyǵynda Qyzylorda qalasy ákimdiginde jaýapty qyzmetter atqarǵan. 2002-2014 jyldary Qyzylorda oblystyq mádenıet basqarmasy basshysynyń orynbasary, Qyzylorda oblysy ákimi apparatynyń áleýmettik -saıası bóliminiń meńgerýshisi, Shıeli aýdany ákimi apparatynyń jetekshisi, ákiminiń orynbasary. Qyzylorda oblystyq ishki saıasat, Qyzylorda oblysynyń tilderdi damytý basqarmalarynyń basshysy, Qyzylorda qalasy ákiminiń orynbasary qyzmetterin atqardy.

Al 2014 -2022 jyldar aralyǵynda Qyzylorda oblystyq ishki saıasat basqarmasynyń basshysy, Jańaqorǵan aýdanynyń ákimi, Qyzylorda oblysy ákiminiń orynbasary, Syrdarııa, Jańaqorǵan aýdandarynyń ákimi boldy.

2022 jyldyń sáýir aıynan bastap Qyzylorda oblysynyń mádenıet jáne sport basqarmasynyń basshysy qyzmetin atqarýda.

Foto: gov.kz