Qyzylorda oblysynda prokýratýra 600 kásipkerdiń buzylǵan quqyǵyn qalpyna keltirdi
Qyzylorda oblysynyń prokýrory Nurlan Bıjanovtyń tóraǵalyǵymen bıznes ókilderiniń buǵan deıin bildirgen shaǵymdarynyń qaralý nátıjesin habarlaý jáne jańa shaǵymdaryn tyńdaý maqsatynda kezdesý ótti.
Ótken jylmen salystyrǵanda bıyl berilgen talap aryzdar 89-dan 24-ke nemese 73%-ǵa azaıǵan.
«Oblystyq prokýratýra bıylǵy jyldyń 5 aıynda qoldanylǵan 29 qadaǵalaý hattamanyń qaralýy nátıjesinde 306 hattama men 111 ákimshilik istiń kúshi joıyldy. Sondaı-aq, 600 kásipkerdiń buzylǵan quqyǵy qalpyna keltirildi, 68 kásipkerdiń 53 mln teńge qarjysy óndirildi.
Prokýratýra kásipkerlerge dereý qoldaý sharalaryn iske asyrý úshin táýlik boıy jumys isteıtin mobıldi toptardyń jumysy uıymdastyrylǵan. Bıyl 142 sıgnal qaralyp, 70-ne zań talaby túsindirildi, 72 shaǵym qanaǵattandyryldy. Atap aıtqanda, qadaǵalaý aktisimen 54 kásipkerge tıesili 26,1 mln teńge memlekettik satyp alý shartynyń oryndalýyn qamtamasyz etý qarjysy óndirildi. Oǵan qosa 18 kásipkerge qoldanylǵan ákimshilik jazalardyń kúshi joıyldy.
Odan basqa ótken jyldyń 29 qyrkúıeginde Bas prokýratýra alańynda bıznestiń álsiz tustaryn retteýge baǵyttalǵan Birlesken sharanyń keshendi jospary qabyldandy.
Jospardy oryndaý tártibinde qoldanylǵan sharalardyń arqasynda Memlekettik kirister organdarynyń salyqtyq buıryqty zańsyz qabyldaý tájirıbesi toqtatyldy», - dep málim etti oblystyq prokýratýradan.
Sondaı-aq, «Qoǵamdyq baqylaý – túbirtekti talap et» jobasynyń zańdylyǵy taldandy. Kirister organdarynda qalyptasqan salyqtyq tekseristerdi zańsyz júrgizý jáne kásipkerlerdi negizsiz ákimshilik jaýapqa tartýdyń tájirıbesi joıyldy.
«Salyq qyzmetkerler uıaly telefon qosymshasy arqyly túsken habarlama negizinde saýda oryndaryna shyǵyp nemese kásipkerlerdi shaqyrǵan. Olardan túsinik alyp, tekseris jasaǵan. Oǵan qosa jetkilikti dáleldemesiz ákimshilik jaýapqa tartqan. Salyq ókilderi 93 kásipkerdi negizsiz ákimshilik jazaǵa tartqany jáne 8 jaǵdaıda zańsyz tekseris júrgizgeni úshin ákimshilik jaýapqa tartyldy. Ákimshilik isterdiń kúshi joıyldy, 5 qyzmetkerdiń tártiptik jaýaptylyǵy sheshildi», - dep tolyqtyrdy vedomstvodan.
Eske salsaq, budan buryn Qyzylorda oblysynda alıment boıynsha bereshek 136 mln teńgege azaıǵan.
