Qyzylorda oblysynda ozat eńbekkerler avtokólikke ıe boldy
QYZYLORDA. QazAqparat - Búgin Qyzylorda oblysy ákiminiń orynbasary Serik Qojanııazovtyń qatysýymen Tań aýyldyq okrýginde «Tań LTD» jaýapkershiligi shekteýli seriktestiginiń jyl qorytyndysynda ozat eńbekkerlerdi marapattaý rásimi ótti. Bul týraly QazAqparat tilshisi oblystyq ákimdikke silteme jasap habarlady.
Aq kúrishten taý turǵyzǵan «Tań LTD» jaýapkershiligi shekteýli seriktestigi 1163 gektar jerge syr marjanyn egip, ár gektardan 67 tsentnerden astyq jınap, jyldy zor tabyspen aıaqtady. Jer ananyń jomarttyǵynyń arqasynda jazdaıǵy mańdaı terdiń berekeli bıigine shyqqan «Tań LTD» jaýapkershiligi shekteýli seriktestiginiń ozat eńbekkerlerin oblys ákiminiń orynbasary S.Qojanııazov marapattap, avtokólik kiltin tabystady.
Ozat eńbekkerler qatarynda «Tań LTD» JShS-niń agronomy E.Aqbergenov, ózine bekitilgen 45 gektar jerden, ár gektardan 80 tsentnerden ónim alǵan kúrishshi J.Shondybaev, ózine berilgen 500 gektar jerden, ár gektardan 70 tsentnerden ónim alǵan Myrzabaı ahýn aýylynyń turǵyny, brıgadır E.Bazarbaev, úzdik sharýashylyq mehanızatory S.Qulahmetov bar.
Astyq - Otan baılyǵy desek, sol baılyqty tókpeı-shashpaı jınap alǵan dıhan qaýymy búginde zor qýanyshqa kenelýde. 
