Qyzylorda oblysynda órtten 76 jastaǵy qarııa qutqaryldy

QYZYLORDA. QazAqparat - Qyzylorda oblysynda turǵyn úıde bolǵan órtten 76 jastaǵy qarııa qutqaryldy, dep habarlaıdy QazAqparat tilshisi.

Oqıǵa búgin, 22 aqpanda saǵat 12.18 shamasynda Qazaly aýdanynyń ortalyǵy Áıteke bı kentinde, J. Aımaýytov kóshesi boıyndaǵy turǵyn úıde bolǵan.

«Atalǵan shaqyrtý boıynsha oqıǵa ornyna órt sóndirý bóliminen 12 qyzmetker 2 tehnıkamen jetti. Barlaý jumystary barysynda karkastan salynǵan turǵyn úı tolyq janyp jatqany belgili boldy. Órt ishinde adam qalyp qoıýy múmkin ekendigi anyqtaldy. №9 órt sóndirý bóliminiń qaraýyl bastyǵy Á.Súleımen bastaǵan mamandar 1947 jyly týǵan áıeldi qutqaryp, jedel járdem qyzmetine tapsyrdy. Azamatshanyń densaýlyǵy dárigerlerdiń jiti baqylaýynda», - dep málim etti Qyzylorda oblysy Tótenshe jaǵdaılar departamenti órt sóndirý jáne avarııalyq-qutqarý jumystary qyzmetinen.

Vedomstvo málimetinshe, órttiń taralýy 12.37-te oqshaýlandyrylyp, 12.54-te tolyq sóndirildi. Oqıǵa sebebi men shyǵyny anyqtalyp jatyr.