Qyzylorda oblysynda «Orda» turǵyn úı qurylysynyń jol kartasy ázirlendi
QYZYLORDA. QazAqparat-Qyzylorda oblysynyń ákimi Qyrymbek Kósherbaev oblystyq máslıhattyń kezekti XVII sessııasynda aımaq turǵyndaryn qoljetimdi turǵyn úımen qamtamasyz etý baǵdarlamasy ázirlengenin málimdedi, dep habarlady QazAqparat tilshisi.
«Orda» turǵyn-úı qurylysynyń jol kartasy 3 jylǵa eseptelgen. Bul qujattyń negizgi maqsaty - oblys turǵyndaryn qoljetimdi baspanamen qamtamasyz etý. Ásirese, áleýmettik qoldaýdy qajet etetin turǵyndarǵa arnalady», - dep atap ótti oblys ákimi Qyrymbek Kósherbaev.
Aıta ketý kerek, 2017 jyldyń 10 aıynda oblys turǵyndarynyń óz qarjysymen baspana turǵyzý jaǵdaıy 18 paıyzǵa ósken.
Sondaı-aq, aımaq basshysy oblystyń áleýmettik-ekonomıkalyq damý barysyna da toqtaldy. Osy jyly óńir ekonomıkasynyń negizgi salalarynda ósim baıqalady. Tek munaı óndirisiniń tómendeýi saldarynan ónerkásip kólemi azaıǵan. Degenmen, Qyzylorda oblysy negizgi salalar boıynsha respýblıkada aldyńǵy qatarda. Sońǵy 4 jylda shıkizattyq emes ónerkásip sektorynda óndiris kólemi 28 paıyzǵa ósti, al respýblıkada ol - 6,4 paıyz.
Bıyl 10 aıda 500 myń sharshy metr turǵyn úı paıdalanýǵa berildi.
Atap aıtqanda, jyl basynda tek bıýdjet qarjysy esebinen 28 kópqabatty turǵyn úı salynyp, 1560 páterde qonys toıy toılandy. Búginde apatty jaǵdaıdaǵy úıler máselesi tolyǵymen sheshildi. Sonymen qatar, jeke turǵyn úı qurylysy úshin 20600 jer teliminiń ınjenerlik ınfraqurylymdary tartyldy.
Oblysta shaǵyn jáne orta bıznes sýbektileriniń sany 7 paıyzǵa ósti, al kásiporyndarda jumyspen qamtylǵandar 4 myń adamǵa jetti. Jyl basynan beri oblysta 12 myń jańa jumys orny ashyldy.
Keńesti qorytyndylaı kele, oblys ákimi Qyrymbek Kósherbaev «Oblystyń barlyq jetistikterine Memleket basshysy Nursultan Nazarbaevtyń syndarly saıasaty men táýelsiz Qazaqstannyń turaqtylyǵynyń arqasynda jettik», - dep atap ótti.
