Qyzylorda oblysynda onlaın-agrobırja iske qosyldy

QYZYLORDA. QazAqparat - Qyzylorda oblystyq aýyl sharýashylyǵy basqarmasynyń bastamasymen aýylsharýashylyq ónimderin, tuqym, aýyl sharýashylyǵy tehnıkalaryn, tyńaıtqyshtardy, hımııalyq zattardy satyp alýǵa, satýǵa nemese aıyrbastaýǵa jáne qyzmetterdi paıdalanýǵa bolatyn «Agrobırja» ınternet-resýrsy iske qosyldy, dep habarlaıdy QazAqparat oblys ákiminiń baspasóz qyzmetine silteme jasap.

Aýyl sharýashylyǵy vıtse-mınıstri Gúlmıra Isaevanyń aıtýynsha, Qyzylorda oblysynyń Agrobırja qurý tájirıbesi barlyq óńirge usynylady.

Qyzylorda oblysy aýyl sharýashylyǵy basqarmasynyń bastyǵy Baqyt Jahanov málim etkendeı, kóp jaǵdaıda taýar óndirýshiler naryqqa tikeleı qol jetkize almaıdy. Óndirilgen taýardy qaıda, kimge jáne qaı baǵada satatynyn bilmeıdi. Bul - tek aımaqta ǵana emes, respýblıkada da sheshimin tappaı otyrǵan problemalardyń biri.

«Azyq-túlik taýarlary baǵasynyń ósýine yqpal etetin faktorlardyń biri - deldaldardyń kóptigi. Bul eshkimge jasyryn emes, sarapshylardyń pikirinshe olardyń úlesi 65-85%-dy quraıdy. Bul burmalanǵan baǵa men baǵany negizsiz kóterýge alyp keledi, al taýar óndirýshilerdiń ózi az paıdaǵa qanaǵat etip otyr. Osy maqsatta biz «Agrobırja» elektrondy platformasyn qurdyq. Ol satylym naryǵyn keńeıtýge, satyp alýshy men satýshy arasynda tikeleı baılanys ornatýǵa, eksporttyq operatsııalardy arttyrýǵa múmkindik beredi», - deıdi Bahyt Jahanov.

Eske salaıyq, www.agrosauda.kz  veb-saıtyndaǵy aqparat qazaq, orys, aǵylshyn jáne qytaı tilderinde usynylǵan. Bolashaqta oǵan parsy tilin qosý josparlanyp otyr. Aıta keteıik, qyzylordalyq agrarlar óz ónimderin eksporttaıtyn elderdiń biri - Iran.

Qazirgi ýaqytta ınternet-resýrsty jetildirý jumystary jalǵasýda. Jaqyn arada «Agrobırja» mobıldi qosymshasy iske qosylady.