Qyzylorda oblysynda oba indetiniń taralýynan qaýiptenýge esh negiz joq - maman
QYZYLORDA. QazAqparat - Baıqońyr qalasy ákimshiliginiń saıtynda osy óńirden oba indetiniń belgileri tabylǵandyǵy jaıly jarııalanǵan habarlamaǵa oraı búgin óńirlik kommýnıkatsııa qyzmetinde oblystyq obaǵa qarsy stansa jetekshisi Alma Matjanova brıfıng ótkizdi, - dep habarlady QazAqparat.
Onyń aıtýynsha, oblysta obanyń tabıǵı oshaqtary ornalasqan aýmaqtar bar. Olar udaıy qadaǵalanyp, turǵyndar arasynda oba aýrýyn boldyrmaý úshin epıdemııaǵa qarsy is-sharalar josparly túrde júrgiziledi. Kemirgishter men oba qozdyrǵyshyn tasymaldaýshy búrgede epızootııa bar-joǵy jete zertteledi.
Osyndaı zertteý jumystary kezinde Baıqońyr qalasynan 12 shaqyrym jerde tabıǵı oshaqtyń belsendiligi artqany baıqalǵan. Ol jerden aýlanǵan kemirgishterden oba qozdyrǵyshtary tabyldy. Anyqtalǵan epıoozotııa jaıly «Baıqońyr» kesheni basshylyǵy habardar etildi.
- Biraq qala ákimshiliginiń taratyp otyrǵan habarlamasy jansaq. Bul tótenshe jaǵdaı emes, adamdarǵa qaýip te tónip turǵan joq. Sondyqtan dúrligýge de negiz joq dep bilemiz,- deıdi oblystyq obaǵa qarsy stansa jetekshisi Alma Matjanova brıfıng barysynda.
Jyl saıyn obaǵa qarsy kúres stansalary osyǵan uqsas epızootııalardy anyqtap, aldyn alý sharalaryn júrgizip otyrady. Osyndaı júıeli jumystar arqasynda 2003 jyldan beri Qazaqstanda turǵyndar arasynda oba aýrýy tirkelgen joq.
