Qyzylorda oblysynda «Nurly jer» boıynsha alǵashqy úıdiń jobasy maquldandy
«SMP-Qyzylorda» JShS qurylys kompanııasy «Nurly jer» baǵdarlamasynyń Qyzylorda oblysy boıynsha alǵashqy qatysýshysy atandy. Aımaqtyq úılestirý keńesiniń otyrysynda kompanııa jobasyna memlekettik qoldaý kórsetý boıynsha oń sheshim shyǵaryldy.
«SMP-Qyzylorda» JShS 2002 jyly qurylǵan. Kompanııa negizi qalanǵan ýaqyttan beri oblys kóleminde kóptegen qurylys nysandaryn salyp, naryqtaǵy senimdi seriktes retinde óz ornyn alǵan. Seriktestiktiń qýatty óndiristik bazasy jumysqa qajetti barlyq qurylǵylarmen jabdyqtalǵan, onyń ishinde eritindi-betondy torap, ustalyq jáne armatýralyq tseh, mehanıkalyq-plastıkalyq tseh, usaq temirbetondy ónimder shyǵaratyn tseh, sondaı-aq 0,36 shaqyrymdyq kirme temir joly bar.
«SMP-Qyzylorda» JShS Qyzylorda qalasynyń Araı móltek aýdanynda turǵyn úı salýǵa (jalpy kólemi 15 myń sharshy metrden astam) «Reseı Sberbanki» AQ-da nesıe rásimdedi. Nesıeniń 14% ústeme aqysyn 7% mólsherin «Nurly jer» baǵdarlamasynyń «Jeke qurylys salýshylardy turǵyn úı qurylysyna yntalandyrý» baǵyty boıynsha «Damý» qory sýbsıdııalaıdy.
Qazirgi tańda kompanııa óz qarajatyna 2 turǵyn úıdiń qurylysyn tolyq aıaqtap, qalǵan 2 kópqabatty úıdiń qurylysyn bastap ta ketken. «SMP-Qyzylorda» JShS dırektory Temirhan Álimqulovtyń sózinshe, memlekettik qoldaýdyń arqasynda kompanııanyń nesıe aýyrtpalyǵy birshama jeńildegen.
«Bizdiń jobamyz sátti júzege asyp, qoldaý tapqanyna qýanyshtymyn. Atalǵan baǵdarlama jergilikti kompanııalardyń qurylys baǵytyn yntalandyra otyryp, ózara básekelestiktiń artýyna múmkindik jasaıdy. Aldaǵy ýaqyta birqatar jobamyzben osy baǵytta jumys jalǵastyrýdy oılastyryp otyrmyz», - deıdi Temirhan Álimqulov.
Eske sala ketsek, «Damý» qory «Nurly jer» baǵdarlamasy boıynsha úı salatyn qurylys kompanııalardyń nesıe paıyzyn sýbsıdııalaıdy. Sýbsıdııa turǵyn úı ǵımarattaryn salýmen aınalysatyn kásipkerlerdiń jańadan alatyn nesıelerine beriledi. Jeke úıdiń qurylysy barysynda 1 sharshy metrdiń quny 120 myń teńgeden aspaıdy. (ınjenerlik-kommýnıkatsııalyq ınfraqurylymdar qunyn eseptemegende).
Sonymen qatar atalǵan baǵdarlama aıasynda halyqtyń «Qazaqstannyń ıpotekalyq kompanııasy» AQ arqyly ekinshi deńgeıli bankterden alǵan ıpotekalyq turǵyn úı nesıeleriniń syıaqy mólsherlemelerin sýbsıdııalaý da qarastyrylǵan. Baǵdarlamanyń talaptary boıynsha - qurylys júrgizýshi kompanııa turǵyn úılerdiń kem degende 50 paıyzyn «Turǵyn úı qurylys jınaq banki» arqyly, shekti baǵamen ótkizýi kerek.
