Qyzylorda oblysynda nashaqorlyq órship tur: Ákimder qyzmetterinen ketýde
QYZYLORDA. QazAqparat - Qyzylorda oblysynda 2012 jylǵa qaraǵanda esirtki plantatsııalary birneshe esege artyp ketken. Naqtyraq aıtqanda, 15-ten 84-ke kóbeıip, 2017 jyldyń ózinde oblys aýmaǵynda 72 myń túp nemese 50 tonna sora ósimdigi anyqtalǵan, dep habarlaıdy QazAqparat tilshisi Qyzylorda oblystyq prokýratýrasyna silteme jasap.
Bul másele Qyzylorda oblysynyń Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda qaraldy. Onda ýákiletti organdarmen esirtki bıznesine qarsy is-qımyl sharalarynyń tıimdiligine jáne nashaqorlyqtyń aldyn alýda atqarylǵan jumystarǵa qatysty máseleler qaraldy.
Qyzylorda oblysynyń klımattyq jaǵdaıy esirtki zattarynyń jeke túrleriniń aınalymyna qolaıly. Ásirese, úndi sorasy atalatyn túri jergilikti jerdiń aýa raıyna beıim keledi. Sarapshylar atalǵan soranyń belsendi komponentteriniń ózindik erekshelikteri Jambyl Shý alqabynda ósetin sora quramynan 5 ese artyq ekenin aıtady. Sondyqtan atalmysh ónimge suranys joǵary bolady. Tıisti sala mamandarynyń aıtýynsha, aımaqta 3,5 myń adam geroın tutynady. Olardyń sany jyl saıyn 200-den astam adamǵa kóbeıip otyr.
«Esirtki bıznesi, esirtkini satý men kontrabanda salasyndaǵy, olardy uıymdastyrýshylar men belsendi tasymaldaýshylardy anyqtaýda qylmystyq toptardyń jolyn kesýde jumystardy kúsheıtýimiz qajet. Osy oraıda quqyq qorǵaý organdarynyń basshylary baǵynysty adamdardyń qyzmetine baqylaýdy kúsheıtip, sybaılas jemqorlyq derekterin boldyrmaýy tıis»,- dedi Qyzylorda oblysynyń prokýrory H.Dáýeshov ýákiletti organ basshylaryna.
Taldý jáne prokýrorlyq yqpal etý aktilerin qaraý nátıjesimen 16 polıtsııa qyzmetkeri men birqatar aýyl ákimderi jazaǵa tartyldy. Onyń ishinde 2-eýi atqaryp otyrǵan qyzmetterinen bosatyldy.
Eske salaıyq, ústimizdegi mamyr aıynyń 24-i kúni Parlament Senatynyń jalpy otyrysynda bir top depýtattar Qyzylorda oblysynda qarasoranyń taralýyna qatysty máseleni kóterip, QR Іshki ister mınıstri Qalmuhanbet Qasymovtyń atyna depýtattyq saýal joldaǵan edi.
