Qyzylorda oblysynda memqyzmetshiler jańajyldyq keshterden bas tartty
Bıyl qyzylordalyq memlekettik qyzmetshilerge Jańa jyl merekesin meıramhanalarda atap ótýdiń ornyna qaıyrylymdylyq sharalaryn uıymdastyrý usynyldy.
«Bıyl oblystaǵy memlekettik mekemelerge jańajyldyq merekege oraı korporatıvtik keshterdi meıramhanalar men dámhanalarda atap ótýden shektelip, onyń ornyna turmysy tómen, az qamtylǵan otbasylar men muqtaj jandarǵa qaıyrymdylyq sharalaryn ótkizýdi usyndyq», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departament basshysynyń orynbasary Berikbol Baıhojaev.
Búginde atalǵan usynys barlyq aýdan ákimdikteri jáne oblystyq statıstıka, ishki memlekettik aýdıt, memlekettik kirister jáne qazynashylyq departamentteri tarapynan qoldaý tapty.
Sondaı-aq, jańa jyl merekesi qarsańynda memqyzmetshiler men olarǵa teńestirilgen qyzmetkerlerdiń zańsyz syılyq alý jáne berý derekteriniń aldyn alý maqsatynda ÚEU ókilderi men qoǵam belsendileri top qurǵan. Olar birlesip, reıdtik sharalar ótkizetin bolady.
«Memlekettik qyzmetshiler men olarǵa teńestirilgen tulǵalarǵa qyzmet babynda syılyqtardy nemese kórsetiletin qyzmetterdi qabyldaýyna tyıym salynady. Olar 2 aılyq eseptik kórsetkishke deıingi kólemde syılyq alǵan jaǵdaıda QR ÁQBtK-niń 677-babyna sáıkes, 600 AEK kóleminde aıyppul salýǵa, al syılyq bergen azamatqa osy Kodekstiń 676-babyna sáıkes, 200 AEK kóleminde aıyppul salýǵa jazalanady. Eger syıaqy kólemi 2 AEK-ten artyq bolsa, onda ol para retinde baǵalanady jáne ony alǵan tulǵa da, bergen tulǵa da qylmystyq jaýapkershilikke tartylady», - dedi B.Baıhojaev.
