Qyzylorda oblysynda medıtsına salasynda jańa ǵımarattar boı kóterdi

QYZYLORDA. QazAqparat - Qyzylorda oblysynda medıtsına salasynda jańa ǵımarattar el ıgiligine aınalyp keledi. Bul densaýlyq saqtaý salasyndaǵy qyzmettiń sapasy men qoljetimdiligin arttyrýǵa oń septigin tıgizip otyr, dep habarlaıdy QazAqparat tilshisi oblys ákimdigine silteme jasap.

Osyndaı mańyzdy jobanyń biri - Qazaly aýdanynyń ortalyǵy Áıteke bı kentinde paıdadanýǵa berildi. Respýblıkalyq bıýdjet esebinen emhana qurylysy aıaqtaldy. Jobalyq quny - 2,3 mlrd. Emdeý orny aýdandaǵy 80 myńnan asa turǵynǵa arnalǵan. Nátıjesinde emdeý orny qoljetimdi jáne joǵary sapaly bastapqy medıtsınalyq-sanıtarlyq kómek kórsetedi. Al ótken jyly naýryz aıynda medıtsınalyq ǵımaraty joq shalǵaı eldi mekenderde taǵy 2 medıtsınalyq beket iske qosyldy.

Byltyr maýsym aıynda ashylǵan qalalyq ortalyq emhana 33 815 adamǵa qyzmet kórsetedi. Osynyń arqasynda №1, №3 jáne №6 qalalyq emhanalardyń júktemesi azaıdy. Bul densaýlyq saqtaý jelisi normatıvke sáıkestendiriline negiz qalady. Al «Aýyl - el besigi» baǵdarlamasy aıasynda Jalaǵash aýdany Tań aýylynda dárigerlik ambýlatorııa iske qosyldy.

Sondaı-aq, «Aýylda densaýlyq saqtaýdy jańǵyrtý» pılottyq ulttyq jobasy aıasynda aýyldyq ınfraqurylymdy damytýǵa baǵyttalǵan 27 nysan qurylysynyń tizimi bekitildi. Olardyń jalpy quny 9,7 mlrd teńgege jýyq. Olardyń qatarynda 24 dárigerlik ambýlatorııa, 2 feldsherlik-akýsherlik beket, 1 medıtsınalyq beket qurylysy bar. Odan bólek, jalpy 6,5 mlrd teńge bolatyn 15 dárigerlik ambýlatorııa jáne 1 medıtsınalyq beket qurylysynyń joba-smetalyq qujattamasy ázirlenip, saraptama qorytyndysy alyndy. Nysan qurylysyna jer ýchaskesi bólinip, ınjenerlik ınfraqurylymy júrgizilgen. Atalǵan 16 nysannyń qurylysy bıyl bastalady dep kútilýde.

Al Aral aýdanyndaǵy Toqabaı, Jalaǵash aýdanyndaǵy Qaraketken. Shıeli aýdanndaǵy Ortaqshyl, Tájibaev, Tartoǵaı, Bestam, Almaly. Jańaqorǵan aýdanyndaǵy Talap, Ábdiǵappar aýyldaryndaǵy 9 dárigerlik ambýlatorııa qurylysy, Qarmaqshy jáne Qýańdarııa eldi mekenderindegi 2 feldsherlik-akýsherlik beket qurylysynyń joba-smetalyq qujattamasy ázirlenip, saraptama qorytyndysyn alý osy jylǵa josparlanǵan.

Sondaı-aq, Aral, Qazaly aýdandarynda 25, Shıeli aýdanynda 30 adamǵa arnalǵan juqpaly aýrýlar bólimi qurylysynyń joba-smetalyq qujattamasy ázirlenýde. Saraptama qorytyndysyn alý josparlanyp, jer ýchaskelerin tańdaý aktisi alynǵan. Aral jáne Qazaly aýdanyna qarasty shalǵaı eldi mekenderde 2 medıtsınalyq beket el ıgiligine berildi. Jergilikti bıýdjet esebinen 71,2 mln teńgege apatty jaǵdaıdaǵy Syrdarııa aýdany Shirkeıli aýylyndaǵy dárigerlik ambýlatorııa ǵımaraty kúrdeli jóndeýden ótkizildi. Qyzylorda qalasynda jylyna 5000-10000 josparly donatsııalyq IV sanattaǵy oblystyq qan ortalyǵynyń qurylysyn jalǵastyrý da josparlanǵan. Bıyl respýblıkalyq bıýdjet esebinen nysan qurylysyn bastaýǵa 250 mln teńge qarjy bólingen.

Oblys halqyna 2820 dáriger jáne 10650 orta býyn mamandary medıtsınalyq qyzmet kórsetedi. Óńirdegi dáriger tapshylyǵyn azaıýtý maqsatynda naqty ister qolǵa alynyp keledi. Oblys ákiminiń qoldaýymen júrgizilip jatqan keshendi is-sharalar nátıjesinde tapshylyq jyldan jylǵa azaıýda.