Qyzylorda oblysynda «qyzyl» statýsy bar 174 adamǵa aıyppul salyndy
Óńirde karantın talaptarynyń saqtalýyna monıtorıng júrgizý jalǵasýda. Jyl basynan beri monıtorıngilik toptyń reıdtik tekserisi negizinde 14 525 nysan qamtyldy. Nátıjesinde karantın talabyn buzýdyń 793 deregi anyqtaldy. Olarǵa QR Ákimshilik quqyq buzýshylyq týraly kodeksiniń 425-baby 1-bóligimen 51 mln teńgeden astam ákimshilik aıyppul salyndy.
«Soǵan qaramastan karantın talabyn buzýshylyq áli de jalǵasýda. Jyl basynan beri toı ótkizýdiń 510 deregi anyqtaldy. Oblys kóleminde «Ashyq» júıesi úı karantıninde oqshaýlaný tártibin buzǵan 1117 azamat naqtylandy. Onyń ishinde 728 adam «qyzyl», 389 tulǵa «sary» mártebege ıe. Oqshaýlaý rejımin buzýshy «qyzyl» mártebedegi 174 adamǵa ákimshilik hattama toltyrylyp, 7 mln teńgeden astam aıyppul salyndy. «Sary» mártebedegi 226 tulǵaǵa sanıtarııalyq indetke qarsy profılaktıkalyq is-sharalardy júrgizý týraly qaýly taǵaıyndaldy.
Qyzylorda oblysy 26 qyrkúıekten bastap «jasyl» aımaqqa aýysty. Aýrýshańdyqtyń táýliktik kórsetkishinde tómendeý tendentsııasy bar. Degenmen saqtyq sharalaryn oryndaý álsiremeýi tıis. Ásirese adam kóp jınalatyn oryndarda betperdelik rejım men áleýmettik ara qashyqtyq saqtaýdy usynamyz», - dedi oblystyq Sanıtarlyq-epıdemıologııalyq baqylaý departamentiniń basshysy Dınara Jańabergenova.
Aıta ketsek, buǵan deıin Qyzylorda oblysynda 126 oqý synyby 14 kúnge karantınge jiberilgenin jazǵan edik.
