Qyzylorda oblysynda qysqy jylý maýsymyna daıyndyq jumystary aıaqtalyp keledi
QYZYLORDA. 24 tamyz. QazAqparat /Jańagúl Serdaly/ - Qyzylorda oblysynda qysqy jylytý maýsymyna daıyndyq jumystary kestege saı júrgizilip, óziniń aıaqtalar shaǵyna jaqyndap keledi.
Bul týraly oblystyq energetıka jáne kommýnaldyq sharýashylyq basqarmasy bastyǵynyń orynbasary Janbolat Qurmanbaev buqaralyq aqparat quraldarynyń ókilderimen ótkizgen máslıhatynda sóz etti.
Qyzylorda qalasy men aýdandar ákimderiniń, bıýdjettik baǵdarlama ákimshileriniń málimetteri boıynsha aldaǵy jylý berý maýsymyna jalpy kólemi 2,9 mlrd. teńge qaralǵan. Onyń ishinde qajetti otyn qoryn alýǵa 2 mlrd. teńgeden astam qarjy bólinse, qalǵan qarjy jóndeý jumystaryna jumsalady. Bıýdjettik mekemelerge 77,6 myń tonna qatty otyn, 57,6 myń tonna suıyq otyn jáne 128,5 myń tonna mazýt alý josparlanǵan. Búgingi tańǵa atalǵan jumystardyń deni oryndalyp tur. Endi jylý qazandyqtaryn jóndeýden ótkizý jumystary tııanaqtalyp keledi.
